නැගෙනහිර කල්මුණේ ප්‍රදේශය කේන්ද්‍ර කරගනිමින් ක්‍රියාත්මක වන ඩොක්ටර් රයිස් නම් අයගේ නායකත්වයෙන් යුත් අන්තවාදී ආගමික කල්ලියක් පිළිබඳව බුද්ධි අංශ ඇතුළු ආරක්ෂක අංශ විසින් අනාවරණය කරගෙන ඇත.
ඔවුන් පවතින ඉස්ලාමීය ධර්මයට වඩා හාත්පසින්ම වෙනස්, තමන් විසින් නිර්මාණය කරන ලද න්‍යායක් අනුගමනය කරන බවට හෙළි වී ඇත. ඉස්ලාමීය ධර්මයේ අධ්‍යාත්මික නායක නබිනායකතුමා ජීවත්ව සිටි සමයේ ආකාරයට ඉස්ලාම් ජනතාව ජීවත් විය යුතු බවත්, ඒ අනුව හිස පළඳින තොප්පිය වෙනුවට ජටාවක් බැඳීම, ගැටලු විසඳීමට පොලිසිය වෙත නොගොස් ආගමික නායකත්වයෙන් විසඳා ගැනීම සහ පළඳින ඇඳුම් වෙනස් කිරීම ඇතුළු කරුණු රැසක් මොවුන් විසින් වෙනස් කරමින් සිටින බවට ඉස්ලාම් ආගමික නායකත්වය විසින් ආරක්ෂක අංශ වෙත දැනුම් දී තිබේ.
මොවුන් ඉස්ලාමීය නිකායක් ලෙස පවත්වාගෙන නොගොස් තට්ටු තුනේ නිවසක පහත මාලයේ ඉතාමත් රහසිගතව ආගමික කටයුතු කරන බවත්, දැනට එහි අනුගාමිකයන් 80ත් 100ත් අතර ප්‍රමාණයක් සිටින බවත් අනාවරණය වී තිබේ.
මේ සම්බන්ධයෙන් ජනාධිපතිවරයා දැනුවත් කර ඇති අතර, මේ පිළිබඳව විශේෂ පරීක්ෂණයක් සිදු කරන බව ආරක්ෂක අංශ සඳහන් කරයි.
https://www.deshaya.lk/article/40/පුවත්/27085/කල්මුණේ-අලුත්-අන්තවාදී-කල්ලියේ-නායකයා-ඩොක්ටර්-රයිස්
