ශ්‍රී ලංකා මහ බැංකුව අද (17) දින ප්‍රකාශයට පත් කරන ලද දෛනික විනිමය අනුපාතික සටහනට අනුව එක්සත් ජනපද ඩොලරයක ගැනුම් මිල රු. 313.29 ක් හා විකුණුම් මිල රු. 327.16 ක් ලෙසින් සටහන්ව තිබේ.
2023 ජූනි 15 දින ඩොලරයක විකුණුම් මිල රු. 328.92 ක් ලෙසින් වාර්තා වූ අතර ඉන්පසු මේ දක්වා ඩොලරයක් වෙනුවෙන් වාර්තා වී ඇති වැඩිම විකුණුම් මිල මෙය වනු ඇත.
මේ අතර ශ්‍රී ලංකා මහ බැංකුව පවසන්නේ 2023 ජූනි මාසය තුළ දී එක්සත් ජනපද ඩොලර් මිලියන 91 ක ප්‍රමාණයක් දේශීය විදේශ විනිමය වෙළෙඳපොළෙන් මිල දී ගැනීමට මහ බැංකුව පියවර ගත් බවයි.
2023 වසර ආරම්භයත් සමඟම මහ බැංකුව සිය සංචිත ශක්තිමත් කරලීමේ අරමුණින් දේශීය විනිමය වෙළෙඳපොළෙන් ඩොලර් මිල දී ගැනීම ක්‍රමයෙන් ආරම්භ කළ අතර එහිදී,
ජනවාරි මාසයේ දී ඩොලර් මිලියන 348.79 ක්,
පෙබරවාරි මාසයේ දී ඩොලර් මිලියන 287 ක්,
මාර්තු මාසයේ දී ඩොලර් මිලියන 451.50 ක්,
අප්‍රේල් මාසයේ දී ඩොලර් මිලියන 147.75 ක් හා
මැයි මාසයේ දී ඩොලර් මිලියන 662.50 ක් වශයෙන්,
වසරේ මුල් මාස 05 තුළ දී ඩොලර් මිලියන 1,897.54 ක ප්‍රමාණයක් මිල දී ගැනීමට මහ බැංකුව පියවර ගෙන තිබුණි.
ඒ අනුව පසුගිය මාස 06 තුළ දී මහ බැංකුව අඩුවෙන්ම ඩොලර් මිල දී ගෙන ඇත්තේ පසුගිය ජූනි මාසය තුළ දීය.
මෙලෙස ජූනි මාසය තුළ මහ බැංකුව මිල දී ගෙන ඇති ඩොලර් මිලියන 91 ත් සමඟින් සමස්තයක් ලෙස 2023 පළමු භාගය තුළ දී ශ්‍රී ලංකා මහ බැංකුව දේශීය විනිමය වෙළෙඳපොළෙන් මිල දී ගෙන ඇති මුළු ඩොලර් ප්‍රමාණය ඩොලර් මිලියන 1,988.54 කි.
මේ අතර ශ්‍රී ලංකා මහ බැංකුව වැඩිදුරටත් පවසන්නේ 2023 වසරේ ජූලි 14 දින දක්වා කාලය තුළ දී එක්සත් ජනපද ඩොලරයට එරෙහිව ශ්‍රී ලංකා රුපියල 14.8% කින් අතිප්‍රමාණය වී ඇති බවයි. අනෙකුත් විදේශ ව්‍යවහාර මුදල්වල හැසිරීම පිළිබිඹු කරමින්, 2023 වසරේ ජූලි 14 වන දින දක්වා කාලය තුළ දී ශ්‍රී ලංකා රුපියල ජපන් යෙන් ( 19.1%), ස්ටර්ලින් පවුම (5.3%), යූරෝ ( 8.9%) සහ ඉන්දියානු රුපියල (13.7%) යන මුදල් ඒකකවලට සාපේක්ෂව ද අතිප්‍රමාණය වී තිබේ.
Ada derana
