ජාත්‍යන්තර ක්‍රිකට් පිටියේ පෑ විශිෂ්ට දස්කම් මෙන්ම සමාජයේදී පළ කරන ශාන්ත, සංයමශීලී සහ ගෞරවාන්විත හැසිරීම හේතුවෙන් ලොව පුරා ප්‍රකට කුමාර් සංගක්කාර සිය උපන්දිනය සැමරූ පසුදාම ගුවන් තොටුපළකදී අප්‍රසන්න අත්දැකීමකට මුහුණ දුන් පුවතක් කරළියට පැමිණ තිබේ. ඩබ්ලින් ගුවන්තොටුපළේදී අයර්ලන්තයේ ප්‍රමුඛතම අඩු පිරිවැය ගුවන් සේවයක් වන රයන්එයාර් (Ryanair) කාර්ය මණ්ඩලය තමන්ට සහ සිය පවුලේ සාමාජිකයන්ට වෙනස්කම් සහගත හා තර්ජනාත්මක අයුරින් සැලකූ බවට චෝදනා නඟයි.
පසුගිය 27දා සිය 49 වන වියට පා තැබූ ශ්‍රී ලංකා හිටපු සුපිරි නායකයා, 28 වන දින ඩබ්ලින් නුවර සිට බ්‍රිස්ටල් බලා පියාසර කිරීමට නියමිතව තිබූ ගුවන් යානයට පිවිසෙන ද්වාරය අසලදී සිදුවූ අනිවාර්ය ආගමන විගමන පරීක්ෂාව අතරතුර මෙම සිදුවීම වාර්තා වී ඇත.
එදින ‘X’ සමාජ මාධ්‍ය ජාලයේ සටහනක් තබමින් සංගක්කාර ප්‍රශ්න කර සිටියේ ඩබ්ලින්හිදී රයන්එයාර් කාර්ය මණ්ඩලයෙන් මෙවැනි වෙනස්කම් සහගත සැලකිල්ලක් ලැබූ වෙනත් කිසිවකු හෝ සිටීද යන්නයි. තමන් සහ සිය පවුල එම අත්දැකීමට මුහුණ දුන් බවත්, කතාබහ කළ ස්වරය, ක්‍රියා පටිපාටිය වැරදි ලෙස හැසිරවීම සහ එල්ල වූ තර්ජනාත්මක හැසිරීම කම්පන සහගත මෙන්ම ඕනෑම මගියෙකු සම්බන්ධයෙන් කිසිසේත්ම පිළිගත නොහැකි එකක් බවත් ඔහු එහි සඳහන් කර තිබිණි.මෙය ඩබ්ලින් නුවරදී තමන් ලැබූ පළමු අයහපත් අත්දැකීම බවද ඔහු කියා සිටියේය.
කෙසේ වෙතත්, එතැනදී කියැවුණු හෝ සිදුවූ නිශ්චිත දේ පිළිබඳ වැඩිදුර විස්තරයක් සංගක්කාර අනාවරණය කර නොතිබිණි.
මෙම චෝදනාව සම්බන්ධයෙන් ඩේලි මේල් (Daily Mail) පුවත්පත මගින් වාර්තා කර තිබූ රයන්එයාර් ගුවන් සේවයේ ප්‍රකාශය මීට පරස්පර විස්තරයකි. අදාළ මගියා අනිවාර්ය ආගමන විගමන පරීක්ෂාවන් අතරතුර නියෝජිතයෙකු ඉල්ලා සිටි අවශ්‍ය වීසා ලියකියවිලි ලබා දීම ප්‍රතික්ෂේප කළ බව එම ගුවන් සේවය සඳහන් කරයි.
කෙසේ වෙතත් කථාබහෙන් පසු ඒවා ලබාදුන් බවත් එම පරීක්ෂාවන් සම්පූර්ණ කර ගමන් කිරීමේ සුදුසුකම් සනාථ කරගැනීමෙන් අනතුරුව, අදාළ මගියා සැලසුම් කළ පරිදි ඔක්තෝබර් 28 වන දින ඩබ්ලින් සිට බ්‍රිස්ටල් බලා පියාසර කළ ගුවන් වාරයෙන්ම ගමන් කළ බවත් රයන්එයාර් පවසා තිබේ.
ඒ අනුව පවුලේ සාමාජිකයන් ගමන සාර්ථකව අවසන් කර ඇති අතර, ගුවන් ගමන ප්‍රතික්ෂේප කිරීමකට වඩා ගැටලුව මතු වී ඇත්තේ සාමාන්‍ය පරීක්ෂාව අතරතුර කාර්ය මණ්ඩලයේ ස්වරය හා හැසිරීම පදනම් කරගෙනය.
කෙසේ වෙතත් තම කලකිරීම හගවමින් ලියා තිබූ සංගක්කාරගේ මෙම සටහන පැය කිහිපයක් ඇතුළත මිලියන ගණනකගේ අවධානය දිනාගනිමින් දැඩි කථාබහක් ඇති කරවන්නට සමත්ව තිබේ.
බ්‍රිතාන්‍යයේ ප්‍රකට මාධ්‍යවේදී පියර්ස් මෝගන් ඊට ප්‍රතිචාර දක්වමින් කියා සිටියේ කුමාර් තරම් විනීත හා ගෞරවනීය මිනිසෙකු තමන් හමු වී ඇත්තේ කලාතුරකින් බවත්, ඔහු මෙවැන්නක් ප්‍රකාශ කිරීමට නම් එය සැබවින්ම ලැජ්ජා සහගත හැසිරීමක් විය යුතු බවත්ය. ඒ පිළිබඳ කඩිනමින් හා නිසි ලෙස කටයුතු කරන ලෙස ඔහු රයන්එයාර් ආයතනයෙන් ඉල්ලා සිටියේය.
ශ්‍රී ලාංකික තාක්ෂණික ව්‍යවසායකයෙකු මෙන්ම ඩබ්ලිව්එස්ඕටූ (WSO2) නිර්මාතෘ සංජීව වීරවරණද ඊට එක්වෙමින් සඳහන් කළේ දශක ගණනාවක් පුරා බටහිර රටවල ජීවත් වෙමින් සහ සංචාරය කරමින් තමන්ද මෙවැනි වෙනස්කම් කිරීම්වලට මුහුණ දී ඇති බවත්, තවදුරටත් එවැනි සැලකිලි පිළිගැනීමට තමන් සූදානම් නැති බවත්ය. ඊට ප්‍රතිචාර දැක්වූ සංගක්කාර කෙටියෙන් සටහන් කර තිබුණේ "එය තමන්ටම අත්විඳින්නට වූ විට දැඩි කම්පනයක් ඇති කරනවා" යනුවෙනි.
මෙම සංවාදයට එක්වූ තවත් පිරිසක් රයන්එයාර් කාර්ය මණ්ඩලයෙන් ආසියානු මගීන්ට මෙන්ම ගමන් මලු නීති සම්බන්ධයෙන් වෙනස්කම් සහගත හෝ දැඩි අයුරින් සැලකූ අතීත අත්දැකීම් සිහිපත් කරමින් ආයතනයෙන් සමාව අයැදීමක් හෝ විමර්ශනයක් ඉල්ලා සිටියහ. තවත් සමහරු ගුවන් සේවයේ දැඩි නීතිරීති ක්‍රියාත්මක කිරීම සාධාරණීකරණය කළ අතර, මෙය වෙනස්කම් කිරීමකට වඩා සාමාන්‍ය රළු හැසිරීමක් විය හැකි බවටද මත පළ කළහ. කෙසේ වෙතත්, ඩේලි මේල් වෙත ලබා දුන් ප්‍රකාශයෙන් ඔබ්බට රයන්එයාර් ගුවන් සේවය ඒ වන විටත් පුළුල් ප්‍රසිද්ධ ප්‍රකාශයක් නිකුත් කර තිබුණේ නැත.
ගුවන් තොටුපළ ද්වාරය අසල දෙපාර්ශ්වය අතර ඇත්තෙන්ම හුවමාරු වූ වචන පිළිබඳ ස්වාධීන තහවුරු කිරීමක් නොමැති පසුබිමක, එක් පාර්ශ්වයකින් වෙනස්කම් සහගත සැලකිල්ලක් ගැන බරපතළ චෝදනාවක්ද, අනෙක් පාර්ශ්වයෙන් නීත්‍යනුකූල පරීක්ෂාවකදී මගියා ලියකියවිලි ලබා දීම ප්‍රතික්ෂේප කළ බවට වූ කරුණු දැක්වීමක්ද ලෙස මෙම සිදුවීම දෙපැත්තකට විහිදී තිබේ. කෙසේ වෙතත්, විදෙස් රටවලදී සංක්‍රමණික සහ ආසියානු මගීන් මුහුණ දෙන අත්දැකීම් පිළිබඳ පුළුල් සමාජ සංවාදයක් මේ හරහා නැවත වතාවක් කරළියට පැමිණ ඇත.
