මීගමුවෙන් බූස්ස, අගුණකොළපැලැස්ස බන්ධනාගාර වලට රැගෙන ගිය රැඳවියන් දෙදෙනෙක් මිය යයි!

monson said:

මීගමුවෙන් ගෙනගිය රැදවියන්ගෙන් පලිගැනීමේ මෙහෙයුමක්.. අමානුෂිකව පහර දෙනවා.. සැක සහිත මරණ දෙකක්..- සුදේෂ් නන්දිමාල්​

lanka C news-July 08, 2026



මීගමුව බන්ධනාගාරයේ ඇති වූ ගැටුමෙන් අනතුරුව දිවයිනේ විවිධ බන්ධනාගාර වෙත මාරු කර යැවූ රැඳවියන්ට එම බන්ධනාගාර තුළදී අතිශය අමානුෂික ලෙස වධහිංසා පමුණුවන බවත්, ඒ හේතුවෙන් තවත් සැකකටයුතු මරණ දෙකක් වාර්තා වී ඇති බවත් සිරකරු අයිතිවාසිකම් සුරැකීමේ කමිටුවේ කැඳවුම්කරු සුදේශ් නන්දිමාල් මහතා චෝදනා කරයි.

අන්තර්ජාල නාලිකාවක් සමඟ සාකච්ඡාවකට එක්වෙමින් ඔහු කියා සිටියේ, මීගමුව බන්ධනාගාරයේදී නිලධාරීන් මියයාමට ප්‍රතිචාරයක් ලෙස බන්ධනාගාර නිලධාරීන් විසින් මෙම රැඳවියන්ගෙන් පළිගැනීමේ මෙහෙයුමක් ක්‍රියාත්මක කරමින් සිටින බවයි.
මීගමුවෙන් අඟුණකොළපැලැස්ස බන්ධනාගාරය වෙත මාරු කළ රැඳවියන්ට අධික පිරිසකට කපා ගන්නා ලද ජල නල භාවිත කරමින් අමානුෂික ලෙස පහර දී ඇති බව නන්දිමාල් මහතා අනාවරණය කළේය.
මෙම ප්‍රහාරය හේතුවෙන් රැඳවියන්ගේ පිටවල් පැළී බරපතළ තුවාල සිදුව ඇති බවත්, බන්ධනාගාර කාර්යාලය අසල ලේ පැවති බවත් ඔහු සඳහන් කළේය.
බූස්ස බන්ධනාගාරයට මාරු කළ රැඳවියෙකු මියයාම හදිසි අසනීප තත්ත්වයක් බව බලධාරීන් පැවසුවද, එය පහරදීමක් නිසා සිදුවූවක් බවට තමන්ට සැකයක් පවතින බව ඔහු පැවසීය.
මීට අමතරව වැලිකඩ බන්ධනාගාරය තුළ ද තවත් රැඳවියෙකු පහරදීමක් හේතුවෙන් මියගොස් ඇති බවට තොරතුරු ලැබී ඇතැයි ඔහු සඳහන් කළේය.
මෙම රැඳවියන් මාරු කිරීමේදී නිසි ලේඛන හෝ ලිපිගොනු නොමැතිව සිදු කර ඇති බැවින්, සිදුවන මරණ සහ තුවාල කිරීම් වසන් කිරීමට බලධාරීන්ට පහසු වී ඇති බවට ද ඔහු මෙහිදී බරපතළ චෝදනාවක් එල්ල කළේය.
"බන්ධනාගාර නිලධාරීන් 7 දෙනෙකු මියයාම ගැන අප කනගාටු වෙනවා. නමුත් ඊට පළිගැනීමක් ලෙස රැඳවියන් 21ක් මරනවා යන ස්ථාවරයේ නිලධාරීන් සිටින බව පෙනෙන්නට තිබෙනවා. මෙය කැලෑ නීතියක්," යැයි පැවසූ නන්දිමාල් මහතා, අධිකරණ අමාත්‍යවරයා මේ සම්බන්ධයෙන් දක්වන මන්දගාමී ප්‍රතිචාරය ද දැඩි ලෙස විවේචනය කළේය.
බන්ධනාගාර පද්ධතිය තුළ පවතින අධික තදබදය සහ නිලධාරීන්ගේ පීඩනය මෙම අර්බුදයට හේතු වී ඇති බවත්, වහාම ස්වාධීන පරීක්ෂණ කමිටුවක් පත් කර මෙම අමානුෂික වධහිංසා නතර කිරීමට රජය මැදිහත් විය යුතු බවත් ඔහු අවධාරණය කළේය.
මානව හිමිකම් කොමිසම ඇතුළු වගකිවයුතු ආයතන මේ පිළිබඳව වහාම අවධානය යොමු කළ යුතු බව ද සුදේශ් නන්දිමාල් මහතා වැඩිදුරටත් ඉල්ලා සිටියේය.

- https://www.lankacnews.com/2026/07/blog-post_96.html

---

------ Post added on Jul 8, 2026 at 4:20 PM

Click to expand...