බුද්ධ ප්රතිමාවට වැන්ද නිසා සෞදියෙන් දඬුවම් නෑ
සෞදි අරාබියේ සේවය කරන ලද ශ්රී ලාංකිකයෙකු බුද්ධ ප්රතිමාවකට වැඳුම් පිදුම් කිරීම නිසා අත්අඩංගුවට ගෙන සිරගත කරනලදැයි පළවන වාර්තාවල සත්යතාවක් නොමැති බව එරට ශ්රී ලංකා තානාපති කාර්යාලය සඳහන් කරයි.
ප්රේමලාල් පෙරේරලාගේ තුංගසිරි නමැත්තෙකු සිය නවාතැන්පොළේ බුද්ධ ප්රතිමාවකට වැඳුම් පිදුම් කිරිම හේතුවෙන් උම්මුල් හමාම්හි පොලිසිය විසින් අත්අඩංගුවට ගෙන බන්ධනාගාරගත කර ඇතැයි කොළඹ කේන්ද්ර කරගත්"බොදුබල සේනා"නම් සංවිධානයක් විසින් ප්රචාරයක් රැගෙන යන ලදී.
මේ පිළිබඳ ක්රියාමාර්ගයක් ගන්නා ලෙස ඉල්ලමින් උක්ත සංවිධානය විසින් CN/158/1205 දරණ අංකය යටතේ ශ්රී ලංකා විදේශ සේවා නියුක්ති කාර්යාංශය වෙත පැමිණිලි කර තිබේ.
කෙසේ වෙතත් සෞදියේ ශ්රී ලංකා තානාපතිසේවයේ ජ්යෙෂ්ඨ නිලධාරියෙකු සඳහන් කර ඇත්තේ තුංගසිරි නමැති පුද්ගලයා අත්අඩංගුවට ගෙන ඇත්තේ වෙනත් චෝදනාවන්ට බව හා මෙම පුවත මුළුමනින්ම ගොතන ලද්දක් බවයි.
සෞදි අරාබියේ රියදුරෙකු ලෙස සේවය කරමින් සිට ඇති ඔහු වෙනත් නිවසක ගෘහ සේවිකාවක ලෙසින් සේවය කරන ඔහුගේ ඥාතීයෙකු සම්බන්ධයෙන් වූ ගැටුමක් සමථයකට පත්කිරීම සඳහා එකී නිවසට ගොස් සිටියදී පොලිස් අත්අඩංගුවට පත්ව තිබේ.
එම සිදුවීමට තම නිවසේ හාම්පුතා කිසිදු ආකාරයකින් සම්බන්ධවී නොමැති බවට තුංගසිරි නමැති ශ්රී ලාංකිකයා එරට ශ්රී ලංකා තානාපති කාර්යාලයට ප්රකාශ කර ඇති බවත්,කෙසේ වුවත් මේවන විට සෞදියෙන් යළි මව්රටට එවීම සඳහා ගුවන්ගමන් බලපත්රය හා අදාළ ලියවිලි බන්ධනාගාර බලධාරීන්ට භාරදී ඇතැයිද Arab News පුවත් සේවය සඳහන් කරයි.
රියාද් හා ජෙදාහ් නගරවල පමණක් 20,000ට අධික සිංහල බෞද්ධයින් වෙසක්,පොසොන් ආදී ආගමික උත්සව සමරන බවත්,සමස්ත සෞදි අරාබිය පුරා ලක්ෂ 5 ට අධික ශ්රී ලාංකික පිරිසක් වෙසෙන බවත් පෙන්වාදෙන එරට ශ්රී ලංකා තානාපති කාර්යාලය ,වෙනත් අභිප්රායන් සඳහා සැදී පැහැදී සිටින කල්ලි කණ්ඩායම් විසින් කරමින් සිටින එරට නම කැත කිරීමේ කටයුත්තට ඉඩනොදෙන ලෙස ශ්රී ලාංකේය ප්රජාවගෙන් ඉල්ලා සිටියි.
http://sinhala.adaderana.lk/news.php?nid=25608
