2025 ජනවාරි 04
ගරු අනුර කුමාර දිසානායක මැතිතුමා
ශ්රී ලංකා ප්රජාතන්ත්රවාදී සමාජවාදී ජනරජයේ ජනාධිපතිතුමා
ජනාධිපති ලේකම් කාර්යාලය
කොළඹ 01
අතිගරු ජනාධිපතිතුමනි,
රෝහින්ග්යා යුද අනාථයන් මියන්මාරයට පිටුවහල් නොකරන ලෙස ඉල්ලීමයි
මුලතිව් මුහුදේ අතරමං ව සිටිය දී ධීවරයන් විසින් දෙසැම්බර් 19 දා බේරාගෙන රජයට බාර දීමෙන් පසු දැන් මුලතිව් ගුවන් හමුදා කඳවුරේ රඳවාගෙන සිටින රෝහින්ග්යා සරණාගතයන් පිරිස ආපසු මියන්මාරයට පිටුවහල් කිරීමට ආණ්ඩුව ගෙන ඇති තීරණය අපේ බලවත් කම්පාවට හේතු වෙයි. යුද බියෙන් ජීවිත බේරාගැනීමට පලා යන මෙම අසරණයන් 103 දෙනා අතර දරු දැරියන් 40 කට වැඩි සංඛ්යාවක් ඉන්නා බව ශ්රී ලංකා මානව හිමිකම් කොමිසම නිවේදනය කර ඇත. ඔවුන්ගේ අපේක්ෂාව ආරක්ෂිත රටක දේශපාලන රැකවරණය ලබා ගැනීමයි.
මහජන ආරක්ෂක සහ පාර්ලිමේන්තු කටයුතු අමාත්ය ආනන්ද විජේපාල විසින් ජනමාධ්යයට ප්රකාශ කර ඇති පරිදි රජයේ සැලසුම ඔවුන් මියන්මාරයටම පිටුවහල් කිරීමයි. ඔවුන්ගේ නම් ලැයිස්තු ඒ ආණ්ඩුවටම ලබා දී ඇති බව ද ඔහු ප්රකාශ කර තිබේ. එය මේ සෑම දෙනාගේම පමණක් නොව මියන්මාරයේ වෙසෙන ඔවුන්ගේ ඥාති මිත්රාදීන්ගේ ද ජීවිත පවා අනතුරේ හෙලීමක් බව අපගේ දැඩි විශ්වාසය යි. එපමණක් නොව ඔවුන් මියන්මාරයට යැවීම යම් රටක දී අනතුරකට ගොදුරු වීමේ අවදානමක් ද සහිත පුද්ගලයන් ඔවුන්ගේ කැමැත්තෙන් තොරව එම රටටම ආපසු යැවීමෙන් වැළකී සිටීමේ (Non Refoulement) ජාත්යන්තර නෛතික මූලධර්මයට ද හරස්ව යාමකි. ඔබතුමාගේ පාලන කාලය තුල මෙරටට ඇතුළු වූ මුල්ම සරණාගත පිරිස ඔවුන් පැමිණි රටේ මාර මුඛයට යැවීමෙන් ලෝකයා හමුවේ අපේ රටට අත් වන්නේ කැළලකි.
ජාතිවාදී ගැටුම්වලින් ගලා ගිය ලෙයින් තෙත් වූ දේශයක ජනතාව ඒ ඉරණමින් ගලවා නොගෙන, දැන දැනම අනතුරේ හෙලීම ජාතිවාදී ගැටුම්වලින් පීඩාවට පත්වූ මේ දේශය සුවපත් කිරීමට පාර්ලිමේන්තුවේ මංගල දේශනයෙන් පොරොන්දු දුන් රාජ්ය නායකයා වන ඔබතුමාට තරම් නොවේ. දශක කිහිපයක් යටිබිම්ගත දේශපාලනයක සැඟවෙන්නට බල කෙරුණු පක්ෂයක නායකයා වන ඔබතුමා රාජ්ය මර්දනයේ තරම කටුක අත්දැකීමෙන්ම දනී.
එමනිසා, ශ්රී ලංකාවේ රඳවාගෙන සිටින රෝහින්ග්යාවරුන් පිරිස තමන්ගේ සුරක්ෂිත භාවය සහතික කරන තවත් රටකට යනතුරු මියන්මාරයට පිටුවහල් නොකර තව දුරටත් අපේ රට තුලම ඔවුන්ගේ සුබ සිද්ධිය සලසා දී, මානව හිමිකම් සුරකින, අසරණයන්ට සරණ වන ශ්රී ලාංකික ආගන්තුක සත්කාරයේ අසිරිය ලොවට විදහා දැක්වීමට මෙය අවස්ථාවක් කරගන්නා මෙන් උදක්ම ඉල්ලා සිටිමි. ඒ සද්ක්රියාව සඳහා එක්සත් ජාතීන්ගේ සංවිධානය ඇතුළු සංවිධානවල පමණක් නොව විපක්ෂයේ ද සහාය ඔබතුමාර ලැබෙනු ඇති බව අපේ විශ්වාසය යි.
ස්තූතියි
මෙයට
මුජිබුර් රහුමාන්
පාර්ලිමේන්තු මන්ත්රී
