පොඩි කෑල්ලක්

ඔයාලා දන්නවද? අලුතින් ඇඳුමක් ගත්තම ඒකේ ටැග් එකත් එක්කම පොඩි ප්ලාස්ටික් කවරයක දාලා බොත්තමකුයි, පොඩි රෙදි කෑල්ලකුයි එල්ලලා තියෙනවා ඔයාලා ඕනෑ තරම් දැකලා ඇති. අපි ගොඩක් දෙනෙක් කරන්නේ ඇඳුම අඳින්න කලින් ඒක කපලා අයින් කරලා කොහේ හරි දාලා අමතක කරන එක. ගොඩක් අය හිතාගෙන ඉන්නේ මේ රෙදි කෑල්ල ලබා දෙන්නේ ඇඳුම මොකක් හරි හේතුවකට ඉරුණොත් ඒකට අණ්ඩක් දාන්න නැත්නම් පැච් එකක් දාන්න කියලයි. හැබැයි මේකේ ඇත්තම කතාව ඊට වඩා ගොඩක් ප්‍රායෝගික වගේම වැදගත් එකක්.
මේ පුංචි රෙදි කෑල්ල ඇත්තටම ලබා දෙන්නේ ඔයාලට "පරීක්ෂණයක්" කරන්නයි. අලුත් ඇඳුම සම්පූර්ණයෙන්ම හෝදන්න කලින්, ඔයාලා පාවිච්චි කරන සබන් කුඩු හරි දියර වර්ග හරි නිසා රෙද්දේ පාට යනවද, එහෙමත් නැත්නම් රෙද්දේ තියෙන නූල් ඇකිලිලා ඇඳුමේ හැඩය වෙනස් වෙනවද කියලා මේ රෙදි කෑල්ල මුලින්ම හෝදලා බලන්න පුළුවන්. විශේෂයෙන්ම වටිනා ඇඳුම් වලට හානියක් වෙන්න කලින් මේ රෙදි කෑල්ලෙන් ඒක පරීක්ෂා කරගන්න ලැබෙන එක ලොකු වාසියක්.

ඒ වගේම තමයි ඇඳුම මැදීමේදී, ඒ කියන්නේ අයන් කරද්දී රෙද්දට ඔරොත්තු දෙන රස්නය කොච්චරද කියලා බලන්නත් මේ රෙදි කෑල්ල පාවිච්චි කරන්න පුළුවන්. සමහර රෙදි වර්ග තද රස්නයට පිච්චෙන්න හරි හැකිළෙන්න හරි ඉඩ තියෙන නිසා, මුලින්ම මේ කුඩා රෙදි කෑල්ල මැදලා බැලීමෙන් ඔයාලගේ අලුත් ඇඳුමට වෙන්න තියෙන ලොකු අනතුරක් වළක්වා ගන්න පුළුවන්. මේක ඇඳුම් නිෂ්පාදනය කරන සමාගම් පාරිභෝගිකයාගේ පහසුව වෙනුවෙන්ම කරන දෙයක්.

අනිත් කාරණය තමයි බොත්තම. ඇඳුම පාවිච්චි කරද්දී අත්වැරදීමකින් බොත්තමක් ගැලවිලා නැති වුණොත්, හරියටම ඒ වගේම බොත්තමක් කඩේකින් හොයාගන්න එක හරිම අමාරු වැඩක්. අන්න ඒ වගේ හදිසි අවස්ථාවකදී පාවිච්චි කරන්න තමයි ඒ අමතර බොත්තම ලබා දෙන්නේ. ඉතින් මින් පස්සේ අලුත් ඇඳුමක් ගත්තම ඒ රෙදි කෑල්ල විසි නොකර මේ වගේ ප්‍රයෝජනවත් වැඩකට පාවිච්චි කරන්න මතක තියාගන්න. මේ වගේ තොරතුරු තවත් කෙනෙක්ට දැනගන්න බෙදාගන්නත් අමතක කරන්න එපා