සම්ප්‍රදායික ථේරවාදී බුදුදහමේ මූලධර්ම මෙන්ම අටුවා විග්‍රහයන්ට පටහැනි අදහස් සමාජගත කිරීම සම්බන්ධයෙන් එල්ල වූ චෝදනා විභාග කිරීමෙන් අනතුරුව, කැකිරාවේ සුදස්සන හිමියන්ගේ නිකායික සාමාජිකත්වය වහාම ක්‍රියාත්මක වන පරිදි අහෝසි කිරීමට ශ්‍රී ලංකා රාමඤ්ඤ මහා නිකායේ මහා සංඝ සභාව තීරණය කර තිබේ.
නිකායේ විනය කමිටුව සහ කාරක සංඝ සභාව එක්ව සිදු කරන ලද විශේෂ විනය පරීක්ෂණයකින් අනතුරුව මෙම දැඩි තීරණය ගෙන ඇත.
එහිදී නිකායික විනය බලධාරීන් නිගමනය කර ඇත්තේ, උන්වහන්සේ විසින් විවිධ අවස්ථාවලදී පවත්වන ලද ඇතැම් ධර්ම දේශනා සහ ප්‍රසිද්ධ ප්‍රකාශ ථේරවාදී සම්ප්‍රදායේ මූලික ඉගැන්වීම්වලට සෘජුවම හානි පමුණුවන බවයි. විශේෂයෙන්ම සම්ප්‍රදායික ථේරවාදී ඉගැන්වීම්වල එන ප්‍රධාන සංකල්ප කිහිපයක් සම්බන්ධයෙන් සුදස්සන හිමියන් ඉදිරිපත් කළ නව්‍ය අර්ථකථනයන් මෙහිදී විනය බලධාරීන්ගේ දැඩි දෝෂදර්ශනයට ලක්ව තිබේ.
කෙසේවෙතත්, මෙම චෝදනා සම්බන්ධයෙන් මීට පෙර අදහස් දක්වා තිබූ කැකිරාවේ සුදස්සන හිමියන් අවධාරණය කර තිබුණේ, තමන් වහන්සේ කිසිදු අවස්ථාවක බුදුදහමේ මූලික සූත්‍ර ධර්මයන් ප්‍රතික්ෂේප කර නොමැති බවයි. පසුකාලීනව දහමට එක්වූ අටුවා විවරණ සහ ජනප්‍රිය ඇදහිලි විශ්වාසයන් ශාස්ත්‍රීය හා විචාරාත්මක දෘෂ්ටිකෝණයකින් යුතුව විග්‍රහ කිරීමට පමණක් තමන් වහන්සේ උත්සාහ කළ බව උන්වහන්සේ පෙන්වා දී තිබිණි.
ශ්‍රී ලංකා රාමඤ්ඤ මහා නිකායේ මහා සංඝ සභාව තරයේ අවධාරණය කර සිටින්නේ, නිකාය නියෝජනය කරන සාමාජික භික්ෂූන් වහන්සේ නමක වශයෙන් ශ්‍රී ලාංකේය ථේරවාදී මූලධර්මයන්ට සහ නිකායික සංඝ සභාව විසින් සම්මත කර පිළිගන්නා ලද සම්මුතීන්ට පූර්ණ ලෙස ගරු කිරීමට සහ බැඳී සිටීමට සෑම භික්ෂුවක්ම වගකීමෙන් යුක්ත වන බවයි.
https://www.lankacnews.com/2026/09/blog-post_81.html
