🌧️ ශ්‍රී ලංකා කාලගුණ යාවත්කාලීන 24/7 | වැසි, සුළං සහ අනතුරු ඇඟවීම්

අද තත්ත්වය — අර්නාබ් සුළි කුණාටුව
බෙංගාල බොක්කේ ඇතිවූ අර්නාබ් සුළි කුණාටුව අද (ඔක්තෝබර් 26) සවස 4ට නිකුත් කළ අනාවැකිය අනුව තවදුරටත් ප්‍රබල වෙනවා. ලංකාවට සෘජු බලපෑමක් නැති වුණත්, ඒ සුළං ධාරාව නිසා දිවයිනේ නිරිතදිග ප්‍රදේශවලට තව දින කිහිපයක්ම වැසි වැඩිවෙනවා.

කාලගුණ දෙපාර්තමේන්තුවේ අනතුරු ඇඟවීම්
• උතුරු, බස්නාහිර, සබරගමුව, දකුණු, වයඹ, මධ්‍යම සහ උතුරු මැද පළාත්වලටත්, ත්‍රිකුණාමලය දිස්ත්‍රික්කයටත් විටින් විට වැසි හෝ ගිගුරුම් සහිත වැසි — සමහර තැන්වල මි.මී. 100ට වැඩි තද වැසි.
• මධ්‍යම කඳුකරයේ බටහිර බෑවුම්, උතුරු, උතුරු මැද, වයඹ පළාත් සහ ත්‍රිකුණාමලය, හම්බන්තොට දිස්ත්‍රික්කවලට විටින් විට පැ.කි.මී. 40–50ක තද සුළං.
• මුහුදේ රතු අනතුරු ඇඟවීමක් — බෙංගාල බොක්කේ සුළං පැ.කි.මී. 80–100 දක්වා, රළ මීටර් 3–4ක්. ධීවරයන්ට එම මුහුදු ප්‍රදේශවලට නොයන ලෙස දැනුම් දී තිබෙනවා.
• ගාල්ල, කළුතර, කෑගල්ල, නුවරඑළිය සහ රත්නපුර දිස්ත්‍රික්කවලට නායයෑම් පූර්ව අනතුරු ඇඟවීම්; කළු ගඟේ (මිල්ලකන්ද, මාගුර) ගංවතුර අවදානම ඉහළ මට්ටමක.

මේ වන විට වාර්තා වූ වැසි සහ බලපෑම
• පසුගිය පැය 24 තුළ වැඩිම වැසි: කරන්දිපොවල් (පුත්තලම) මි.මී. 195.7, කුලියාපිටිය මි.මී. 193, ඉලුප්පෙයිකඩවෙයි මි.මී. 187.5.
• ඔක්තෝබර් 23 සිට අද සවස 6 දක්වා දිස්ත්‍රික්ක 12ක පවුල් 2,736ක 10,500කට වැඩි පිරිසක් පීඩාවට — මාදම්පේ දියේ ගිලී එක් අයෙක් මියගිහින්, නිවාස 215කට අර්ධ හානි.
• අර්නාබ් හෙට (27) ඉතා ප්‍රබල සුළි කුණාටුවක් බවට පත්වී ඔක්තෝබර් 28 පෙරවරු 11.30ට පමණ ඉන්දියාවේ ආන්ද්‍රා වෙරළට ගොඩබසින්න පුරෝකථනය කර තිබෙනවා.

මූලාශ්‍ර: කාලගුණ දෙපාර්තමේන්තුව, ආපදා කළමනාකරණ මධ්‍යස්ථානය — Ada Derana / News 1st / Daily Mirror, 2026-10-26.
ඔබේ ප්‍රදේශයේ වැසි තත්ත්වයත් මේ ත්‍රෙඩ් එකේ කියන්න — හැමෝටම ඒක වැදගත් වෙයි.

හෙට (27) පාසල් වසා
අයහපත් කාලගුණය නිසා හෙට, ඔක්තෝබර් 27, දිවයිනේ සියලුම රාජ්‍ය පාසල් වසා තබනවා — ඒ ආරක්ෂක පියවරක් විදියට, හෙට දවසට විතරයි. පෙර පාසල් සහ ළමා සංවර්ධන මධ්‍යස්ථානත් හෙට වසා තබනවා. හැබැයි සාමාර්ථ පෙළ සෞන්දර්ය විෂයයන්ගේ ප්‍රායෝගික පරීක්ෂණ කලින් සැලසුම් කළ විදියටම තියෙනවා.

කැලණි ගඟ සහ අත්තනගල්ල ඔය — ගංවතුර අනතුරු ඇඟවීම්
වාරිමාර්ග දෙපාර්තමේන්තුව කැලණි නිම්නයේ පහත් ප්‍රදේශවලට ඉදිරි පැය 24 තුළ සුළු ගංවතුර අනතුරු ඇඟවීමක් නිකුත් කරලා තියෙනවා — රුවන්වැල්ල, සීතාවක, දොම්පේ, දෙහිඕවිට, ඇහැලියගොඩ, යටියන්තොට, බුලත්කොහුපිටිය අවට විශේෂයෙන් පරිස්සම් වෙන්න. වැසි දිගටම තිබ්බොත් හංවැල්ලට පහළ ප්‍රදේශවලටත් බලපෑමක් වෙන්න පුළුවන්.
අත්තනගල්ල ඔය සහ උරුවල් ඔය නිම්නවලට ඇම්බර් අනතුරු ඇඟවීමක් හෙට (27) සවස 6 දක්වා වලංගුයි — බස්නාගොඩ ජලාශයේ වාන් දොරටු ඇරලා තියෙන නිසා ජල මට්ටම තවත් ඉහළ යනවා. දිවුලපිටිය, මීරිගම, අත්තනගල්ල, මහර, ගම්පහ, මිනුවන්ගොඩ, ජා-ඇල, කටාන, වත්තල අවට පහත් ප්‍රදේශවල ඉන්න අයත්, ඒ පාරවල්වල යන අයත් ගොඩක් පරිස්සම් වෙන්න.

අර්නාබ් ගැන මතක් කිරීමක්: අර්නාබ් අද රෑ ප්‍රබල සුළි කුණාටුවක් වෙලා, හෙට ඉතා ප්‍රබල වෙලා, 28 පෙරවරු 11.30ට විතර ඉන්දියාවේ ආන්ද්‍රා වෙරළට ගොඩබසින්න පුරෝකථනය කරලා තියෙනවා. ලංකාවට සෘජු බලපෑමක් නැති වුණත් වැසි සහ සුළං තව දිගටම තියෙනවා, මුහුදේ රතු අනතුරු ඇඟවීමත් තියෙනවා — ධීවරයන් ඒ මුහුදු ප්‍රදේශවලට නොයන්න.

පහත් ප්‍රදේශවල ඉන්න අය රෑටත් ජල මට්ටම ගැන ඇහැ ගහගෙන ඉන්න, අනතුරු ඇඟවීම් ආවොත් ඉක්මනට ආරක්ෂිත තැනකට යන්න.

---

නව අනතුරු ඇඟවීම්:
• මහවැලි ගඟේ පහත් බිම්වල සුළු ගංවතුර අවදානමක් – පස්බාගේ කෝරළේ ප්‍රදේශයට වාරිමාර්ග දෙපාර්තමේන්තුවෙන් ඇම්බර් අනතුරු ඇඟවීමක් නිකුත් කරලා තියෙනවා. ගඟ අසල ඉන්න අය විශේෂයෙන් පරිස්සම් වෙන්න.
• කොත්මලේ ජලාශය පිරී යාමට ආසන්නයි – වාන් දොරටු විවෘත වීමට ඉඩ තියෙන නිසා කොත්මලේ ඔය සහ මහවැලි ගඟ අසල (නුගවෙල සිට පොල්ගොල්ල දක්වා) ජනතාව අවදානෙන් ඉන්න.
• පසුගිය පැය 24ට (අද සවස 6ට අවසන්) ස්ථාන 16ක මි.මී. 100ට වැඩි වැසි – සමනලගම 185.4mm, ගවරගිරිය 170.4mm, පහියංගල 170.2mm, ඔපනායක 164.4mm. රත්නපුර, කළුතර, කෑගල්ල, නුවරඑළිය ප්‍රදේශවල ගංවතුර හා නායයෑම් අවදානම තවමත් ඉහළයි.
• අර්නාබ් සුළි කුණාටුව අද රාත්‍රියේ දරුණු සුළි කුණාටුවක් බවට පත්වෙන්න පුළුවන් – මුහුදට යන්න එපා, රළ මීටර් 3-4ක් දක්වා ඉහළ යන්න පුළුවන්.



පරිස්සම් වෙන්න, අනතුරු ඇඟවීම් ගැන අවධානයෙන් ඉන්න.
------ Post added on Oct 26, 2026 at 11:32 PM

---

ජාතික ගොඩනැගිලි පර්යේෂණ ආයතනය (NBRO) රත්නපුර දිස්ත්‍රික්කයේ ප්‍රදේශ 6කට 3 වන මට්ටමේ රතු නායයෑම් අනතුරු ඇඟවීමක් නිකුත් කරලා තියෙනවා. මේක හෙට (ඔක්තෝබර් 27) පස්වරු 2.45 දක්වා වලංගුයි.

රතු අනතුරු ඇඟවීම් ඇති ප්‍රදේශ: රත්නපුර, අයගම, පැල්මඩුල්ල, කුරුවිට, ඇලපාත, ඕපනායක

ඒ වගේම කළුතර, මහනුවර, කෑගල්ල, කුරුණෑගල, නුවරඑළිය දිස්ත්‍රික්කවලට ඇම්බර් (2 මට්ටම) අනතුරු ඇඟවීම්, ගාල්ල, ගම්පහ ඇතුළු ප්‍රදේශවලට කහ (1 මට්ටම) අනතුරු ඇඟවීම් තියෙනවා.

බිමේ ඉරිතැලීම්, ගස් ඇලවීමක්, අසාමාන්‍ය විදියට වතුර කාන්දු වෙනවා දැක්කොත් වහාම ආරක්ෂිත තැනකට යන්න. නිල උපදෙස් අනිවාර්යයෙන්ම අනුගමනය කරන්න, රතු ප්‍රදේශවල අය විශේෂයෙන් පරිස්සම් වෙන්න!
------ Post added on Oct 27, 2026 at 12:03 AM

---

අලුත් යාවත්කාලීනය: NBRO එකෙන් රතු (Level 3) නායයෑම් අනතුරු ඇඟවීම දැන් රත්නපුරට අමතරව කළුතර සහ නුවරඑළිය දිස්ත්‍රික්කවලටත් පුළුල් කරලා තියෙනවා. මේ අනතුරු ඇඟවීම ඔක්තෝබර් 27 හවස 6 වෙනකන් බලපවත්වනවා.

රතු කලාප:
• රත්නපුර දිස්ත්‍රික්කය: රත්නපුර, අයගම, පැල්මඩුල්ල, කුරුවිට, ඇලපාත, ඔපනායක
• කළුතර දිස්ත්‍රික්කය: බුලත්සිංහල, දොඩංගොඩ
• නුවරඑළිය දිස්ත්‍රික්කය: අඹගමුව කෝරළේ, නෝර්වුඩ්

රතු කලාපවල ඉන්න අය: වැස්ස දිගටම තියෙනවා නම් බලධාරීන්ගේ උපදෙස් අනුව ඉක්මනින් ආරක්ෂිත තැනකට යන්න, බලාගෙන ඉන්න එපා. බිමේ ඉරිතැලීම්, අසාමාන්‍ය විදියට වතුර ගලන එක, ගස් ඇලවෙන එක, වතුර ගලායාම එකපාරටම වෙනස් වෙන එක වගේ ලකුණු දැක්කොත් වහාම අවධානයෙන් ඉන්න.

පරිස්සමින් ඉන්න හැමෝම!
------ Post added on Oct 27, 2026 at 1:02 AM

වාරිමාර්ග දෙපාර්තමේන්තුවෙන් අලුත් අනතුරු ඇඟවීමක් — ගිං ගඟ නිම්නයේ පහත් බිම්වල සුළු ගංවතුර තත්ත්වයක් ඇතිවෙන්න පුළුවන්.

අනතුරු ඇඟවීම නිකුත් කළේ ඔක්තෝබර් 26 රාත්‍රී 10.30ට. ඒක ඔක්තෝබර් 27 රාත්‍රී 10.30 දක්වා වලංගුයි.

අවදානම් ප්‍රදේශ:
• තවලම
• නාගොඩ
• බද්දේගම
• වැලිවිටිය-දිවිතුර

ගිං ගඟේ ජල පෝෂක ප්‍රදේශවලට ලැබුණු අධික වර්ෂාව නිසා ගඟේ ජල මට්ටම ඉහළ යමින් තියෙනවා. පහත් බිම්වල ඉන්න අයත්, මේ ප්‍රදේශ හරහා යන රියදුරන්ටත් අතිශයින් ප්‍රවේශම් වෙන්න කියලා උපදෙස් දීලා තියෙනවා. ආපදා කළමනාකරණ අංශත් පූර්ව ආරක්ෂක පියවර ගන්න කියලා දැනුම් දීලා තියෙනවා.

වැස්ස දිගටම තියෙන නිසා ගඟ ළඟ ඉන්න අය ජල මට්ටම ගැන හොඳට අවධානයෙන් ඉන්න. අනතුරක් දැනුනොත් ඉක්මනින් ආරක්ෂිත තැනකට යන්න.

ඔක්තෝබර් 27 මධ්‍යම රාත්‍රිය වන විට ගංගා කිහිපයක් සුළු ගංවතුර මට්ටමට ඇවිත් තවමත් ඉහළ යනවා.

සුළු ගංවතුර මට්ටමේ ගංගා:
• කළු ගඟ, රත්නපුර – මීටර් 8.63 (මට්ටම මීටර් 7.50) – ඉහළ යනවා, වර්ෂාව මිලිමීටර් 63.5
• කුඩා ගඟ, මිල්ලකන්ද – මීටර් 6.89 (මට්ටම මීටර් 6.50) – ඉහළ යනවා, වර්ෂාව මිලිමීටර් 72.7
• නිල්වලා ගඟ, පනාදුගම – මීටර් 6.29 (මට්ටම මීටර් 6.00) – ඉහළ යනවා, වර්ෂාව මිලිමීටර් 54.8
• අත්තනගලු ඔය, දුනාමලේ – මීටර් 4.54 (මට්ටම මීටර් 4.40) – ඉහළ යනවා, වර්ෂාව මිලිමීටර් 80.8

අවධානයෙන් ඉන්න තැන්:
ගිං ගඟේ බද්දේගම (මීටර් 3.52) සහ තවලම (මීටර් 5.27)ත් ඉහළ යනවා – තවලමට මිලිමීටර් 123.8ක්, බද්දේගමට මිලිමීටර් 116.2ක් වැස්ස. කළු ගඟේ මගුර (මීටර් 5.13)ත් ඉහළ යනවා. හොඳ ආරංචියක් තමයි කැලණි ගඟේ හංවැල්ල සහ ග්ලෙන්කෝස් ජල මට්ටම් බහින එක.

පහත් බිම්වල ඉන්න අය ගඟ ළඟට යන්න එපා, ගංවතුරට යටවුණු පාරවල්වලින් යන්න එපා, නිල උපදෙස්වලට ඇහුම්කන් දෙන්න. වතුර වේගෙන් වැඩිවෙනවා නම් ඉක්මනටම උස් තැනකට යන්න.

අද උදෑසන (ඔක්තෝබර් 27) තත්ත්වය: වාසිගමේ ජල මට්ටම් ඉහළ යෑමත් එක්ක රටේ ගංවතුර අවදානම තවත් වැඩිවෙලා තියෙනවා කියලා වාරිමාර්ග දෙපාර්තමේන්තුව කියනවා. කලු ගඟ සැලකිය යුතු විදියට ඉහළ ගිහින්, කැලණි ගඟ ඇතුළු තවත් ගංගා කිහිපයකම ජල මට්ටම වැඩිවෙලා.

ජලාශවලින් ජලය මුදා හැරීම: දෙදුරු ඔය ජලාශයෙන් තත්පරයට ඝන අඩි 5,300ක් විතරත්, රජංගනය ජලාශයෙන් තත්පරයට ඝන අඩි 2,300ක් විතරත් මුදා හරිනවා. අනුරාධපුර, ත්‍රිකුණාමලය, පුත්තලම, කුරුණෑගල පැතිවලට ලැබුණු තද වැස්ස නිසා තමයි මේ වාන් දොරටු ඇරලා තියෙන්නේ. ගංගා අසල පහත් බිම්වල ඉන්න අය එකපාරට එන තද වැස්සකදී ජලය ගලන්න පුළුවන් නිසා හොඳටම පරිස්සම් වෙන්න.

අද කාලගුණය: උතුරු, බස්නාහිර, සබරගමුව, දකුණු, වයඹ, මධ්‍යම, උතුරු මැද පළාත්වලත් ත්‍රිකුණාමලය දිස්ත්‍රික්කයේත් වැසි හෝ ගිගුරුම් සහිත වැසි එනවා. සමහර තැන්වල මි.මී. 75ට වැඩිය වැස්ස පුළුවන්. සුළං වේගය පැ.කි.මී. 40–50ක් විතර වෙන්න පුළුවන්.

අර්නාබ් කුණාටුව: අර්නාබ් තවත් බලවත් වෙලා හෙට (28) ඉන්දියාවේ ආන්ධ්‍ර වෙරළට ළඟා වෙන්න නියමිතයි. ලංකාවට සෘජු බලපෑමක් නැති වුණත්, බෙංගාල බොක්කේ මුහුදේ සුළං පැ.කි.මී. 80–100ක්, රළ මීටර් 3–4ක් වෙන රතු අනතුරු ඇඟවීම තවම තියෙනවා — ධීවරයෝ ඒ මුහුදු ප්‍රදේශවලට යන්න එපා.

කලින් දැනුම් දුන්නු නායයෑම් රතු/කහ අනතුරු ඇඟවීම් සහ ගංගා අනතුරු ඇඟවීම් අද සවස වෙනකම්ම බලපවත්වනවා. ගඟ අසල, පහත් තැන්වල ඉන්න අය නිල නිවේදන අහගෙන, අවදානමක් දැනුණොත් කලින්ම ආරක්ෂිත තැනකට යන්න.

ආපදා කළමනාකරණ මධ්‍යස්ථානයේ (DMC) අද උදෑසන නවතම වාර්තාව:
• ඔක්තෝබර් 23 සිට ඇද හැලෙන වැස්සෙන් දිස්ත්‍රික්ක 12ක ප්‍රාදේශීය ලේකම් කොට්ඨාස 57ක පවුල් 2,736ක පුද්ගලයින් 10,545 දෙනෙකු බලපෑමට ලක්වෙලා.
• ආරක්ෂක මධ්‍යස්ථාන 4ක 182 දෙනෙකු රැඳී ඉන්නවා — කොළඹ 27ක්, රත්නපුර 33ක්, මන්නාරම 122ක්.
• නිවාස 215ක් අර්ධ වශයෙන් හානි වෙලා; පුත්තලමේ දියේ ගිලී 56 හැවිරිදි පුද්ගලයෙකු මියගිහින්.
• පසුගිය පැය 24 තුළ කිලිනොච්චි, මන්නාරම, යාපනය, මුලතිව් සහ කළුතරට මි.මී. 100ට වැඩි වැසි.
• වාරිමාර්ග දෙපාර්තමේන්තුව: ප්‍රධාන ජලාශ 17ක් සහ මධ්‍යම ජලාශ 13ක් මේ වෙද්දේ වාන් දමනවා — ගිං, නිල්වලා, කළු, කැලණි ගංගා සහ අත්තනගලු ඔය, මා ඔය අවට පහත් බිම්වල සුළු ගංවතුර අවදානමක් තියෙනවා.

මතක් කිරීම: පහත් බිම්වල ඉන්න අය වතුර මට්ටම ගැන අවධානයෙන් ඉන්න, ගංවතුරට යටවුණු පාරවල්වලින් යන්න එපා. රතු නායයෑම් අනතුරු ඇඟවීම් තියෙන ප්‍රදේශවල වැස්ස දිගටම තිබුණොත් ආරක්ෂිත තැනකට යන්න.

අර්නාබ් සුළි කුණාටුව තවමත් ඉතා දරුණු තත්ත්වයේ — හෙට (28) පෙරවරු 11.30ට විතර ආන්ද්‍රා වෙරළට ගොඩබසීවි කියලා අපේක්ෂිතයි; ලංකාවට සෘජු බලපෑමක් නැතත් අදත් බස්නාහිර, සබරගමුව, දකුණ, වයඹ සහ මධ්‍යම කඳුකර බෑවුම්වලට තද වැසි හා පැයට කි.මී. 40–50 සුළං.

---

අද උදේ යාවත්කාලීනය:
• අර්නාබ් අද අලුයම 2.30ට කන්කසන්තුරේ සිට කි.මී. 890ක් ඊසාන දෙසින්, අක්ෂාංශ 15.9°N, දේශාංශ 85.4°E අසල 'අතිශය ප්‍රබල කුණාටුවක්' ලෙස පැවතුණා.
• අද සවස 5.30 දක්වා බටහිර-වයඹ දෙසට ගොස්, පසුව වයඹ දෙසට හැරී හෙට (28) උදේ 11.30ට පමණ ආන්ධ්‍ර ප්‍රදේශ වෙරළට කඩා වැදීමට නියමිතයි.
• රතු අනතුරු ඇඟවීම: අනතුරු ඇඟවුණු මුහුදු ප්‍රදේශවල (10°N–20°N, 80°E–95°E) සුළං පැ.කි.මී. 80–140 දක්වා ඉහළ යන්න පුළුවන්, රළ මීටර් 3–4ක් දක්වා! ධීවර හා නාවික ප්‍රජාව ඒ මුහුදු ප්‍රදේශවලට යන්න එපා, දැනට එහි සිටින අය වහාම ඉවත් වෙන්න.
• කොළඹ සිට මුලතිව් දක්වා වෙරළේත් වෙලාවකට ඉතා රළු මුහුදක්, සුළං පැ.කි.මී. 60–65ක්; පුත්තලම සිට පොතුවිල් දක්වා රළ මීටර් 2–2.5ක්. වැසි සමඟ පැ.කි.මී. 60–70ක තද සුළං ඇතිවෙන්නත් පුළුවන්.
• ලංකාවට සෘජු බලපෑමක් නැහැ, ඒත් නිරිත දිගට අදත් වැසි/ගිගුරුම් වැසි, සමහර තැනක මි.මී. 75ට වැඩි වැසි. බටහිර කඳු බෑවුම්, උතුරු, උතුරු-මැද, වයඹ, ත්‍රිකුණාමලය සහ හම්බන්තොටත් පැ.කි.මී. 40–50ක තද සුළං.
• ඊයේ සිට වලංගු නායයෑම් සහ ගංවතුර අනතුරු ඇඟවීම් අද සවස දක්වාම වලංගුයි — පහත්බිම්වල සහ කඳු ආශ්‍රිතව ඉන්න අය විශේෂයෙන් සැලකිලිමත් වෙන්න.

මුහුදු යන්න එපා, අනතුරු ඇඟවීම් තියෙන ප්‍රදේශවල ආරක්ෂිතව ඉන්න!
------ Post added on Oct 27, 2026 at 10:03 AM

---

කන්ද උඩරටට වැසි බලපෑම වැඩියි:
බෝගවන්තලාවේ කෙහෙල්ගමු ඔය පිටාර ගිහින් පහත් ප්‍රදේශ යට වෙලා, හැටන් නගරයේත් ගංවතුර තත්ත්වයක් තියෙනවා. කොටියාගල වත්තෙන් ගලා ආ වැසි ජලයෙන් ගෙවල් කිහිපයක් යට වෙලා.

මාර්ග ගැන අවවාදය:
හැටන්–නුවරඑළිය සහ හැටන්–කොළඹ පාරවල්වල පස් කඩා වැටීමේ අවදානමක් තියෙනවා, පාර මඩ වතුරෙන් ලිස්සන සුළුයි — ඒ පාරවල්වල යන අය හරිම පරිස්සමෙන් යන්න. කොත්මලේ ගැරඬි ඇල්ල උතුරලා නුවරඑළිය–ගම්පොළ පාර හරහා වතුර ගලා ගිහින් පැය ගණනක් වාහන ගමනාගමනය නැවතිලා තිබුණා.

තවත් වැදගත් තොරතුරු:
හලාවේ වැසි ඇළකට වැටී එක් අයෙක් අතුරුදහන් වෙලා කියලා ආපදා කළමනාකරණ මධ්‍යස්ථානය කියනවා. රත්නපුරේ කළු ගඟ සුළු ගංවතුර මට්ටමේ තියෙද්දී වේ ගඟ, කුරු ගඟ වගේ අතු ගංගා වේගයෙන් ඉහළ යනවා, පහත් බිම් කිහිපයක් යට වෙලා.

අද උදෑසනට වැඩිම වැසි: කිලිනොච්චිය 163mm, මන්නාරම 148mm, යාපනය 110mm. වැසි තවත් දවස් දෙකක් විතර පවතින්න පුළුවන් කියලා කාලගුණ විශේෂඥයෝ කියනවා — අර්නාබ් ඉන්දියාවට ගොඩබසිනකන් පරිස්සම් වෙන්න.

ගංවතුර පාරවල් හරහා යන්න එපා, කන්ද / ඇළ ළඟ ඉන්න අය විශේෂයෙන් පරිස්සම් වෙන්න.


------ Post added on Oct 27, 2026 at 10:34 AM

---

ආපදා කළමනාකරණ මධ්‍යස්ථානයේ අලුත්ම වාර්තාව:
බලපෑමට ලක්වෙලා ඉන්නේ දැන් 12,032ක් — පවුල් 3,162ක්, දිස්ත්‍රික්ක 12ක. ආරක්ෂිත මධ්‍යස්ථාන 8ක 304ක් ඉන්නවා. නිවස 227ක් අර්ධ වශයෙන් හානි වෙලා, නිවස 2ක් සම්පූර්ණයෙන්ම විනාශ වෙලා.

වැසි තවමත් නිරිත දිගට දිගටම තියෙනවා — අර්නාබ් සුළි කුණාටුව හෙට (28) උදෑසන 11:30ට විතර ආන්ධ්‍ර වෙරළට ගොඩබසිනකම් මේ තත්ත්වය තියේවි. රත්නපුර, කළුතර, නුවරඑළිය ප්‍රදේශවල රතු නායයෑම් අනතුරු ඇඟවීම් තවමත් වලංගුයි. කළු, නිල්වලා, අත්තනගලු ඔය සුළු ගංවතුර මට්ටමේ.

ත්‍රිවිධ හමුදාවේ මෙහෙයුම් මැදිරි සූදානමින් තියෙනවා. හදිසි උදව් ඕන නම් DMC 117 හෝ 071 680 7807 අමතන්න.

පහත් බිම්වල ඉන්න අය, ගං ඉවුරු අසල අය සහ කඳුකර පාරවල්වල යන අය විශේෂයෙන් පරිස්සම් වෙන්න.
------ Post added on Oct 27, 2026 at 11:03 AM

අර්නාබ් සුළි කුණාටුව ඉන්දියාවේ ආන්ද්‍රා වෙරළට ගොඩබැහැලා දැන් දුර්වල වෙමින් යනවා, ඒ නිසා ලංකාවට තිබුණු සෘජු බලපෑම ටික ටික අඩු වෙනවා. ඒත් අද (ඔක්තෝබර් 29) බස්නාහිර, සබරගමුව පැතිවල සහ මහනුවර, නුවරඑළිය, ගාල්ල, මාතර පැතිවල තැනින් තැන වැසි තියෙන්න පුළුවන්. ඌව පළාතේ සහ මඩකලපුව, අම්පාර, හම්බන්තොට පැතිවල දවල් 1න් පස්සේ වැසි/ගිගුරුම් වැසි තියෙන්න පුළුවන්. මධ්‍යම කඳුකරයේ බටහිර බෑවුම්වල සහ උතුරු, උතුරු මැද, වයඹ පළාත්වල, ත්‍රිකුණාමලය, හම්බන්තොට පැතිවල විටින් විට පැයට කිලෝමීටර් 30-40ක විතර තද සුළං එන්න පුළුවන්. මුහුදේ යන අය — පුත්තලම සිට මුලතිව් දක්වා සහ ගාල්ල සිට පොතුවිල් දක්වා මුහුදු ප්‍රදේශ රළු වෙන්න පුළුවන් නිසා සැලකිලිමත් වෙන්න.