බෙංගාල බොක්කේ පීඩන අවපාතයක් - සුළි කුණාටුවක් දක්වා වර්ධනයවීමේ ඉතා ඉහළ සම්භාවිතාවක්

බෙංගාල බොක්කේ පීඩන අවපාතයක් - සුළි කුණාටුවක් දක්වා වර්ධනයවීමේ ඉතා ඉහළ සම්භාවිතාවක්
https://sinhala.adaderana.lk/news/253970 · අද දෙරණ



ගිනිකොණදිග බෙංගාල බොක්ක සහ ඊට යාබද අන්දමන් හා නිකොබාර් දූපත් ආශ්‍රිත මුහුදු ප්‍රදේශයේ පැවති අඩු පීඩන කලාපය මේ වනවිට පීඩන අවපාතයක් දක්වා වර්ධනයවී ඇති බව කාලගුණ විද්‍යා දෙපාර්තමේන්තුව පවසයි.

නිවේදනයක් නිකුත් කරමින් එම දෙපාර්තමේන්තුව සඳහන් කළේ, මෙම පද්ධතිය බටහිර-වයඹ දෙසට ගමන් කරනු ඇති බවය.

ඒ අනුව එය අද (31) රාත්‍රී 11.30ට පමණ වනවිට ගිනිකොණදිග බෙංගාල බොක්ක මුහුදු ප්‍රදේශය ආශ්‍රිතව ගැඹුරු පීඩන අවපාතයක් දක්වා වර්ධනය වීමට ඉතා ඉහළ සම්භාවිතාවක් පවතින බව කාලගුණ විද්‍යා දෙපාර්තමේන්තුව අවධාරණය කරයි.

මෙය තවදුරටත් බටහිර-වයඹ දෙසට ගමන් කරමින්, හෙට (01) පෙරවරු 11.30ට පමණ වනවිට ගිනිකොණදිග සහ ඊට යාබද නිරතදිග හා බටහිර-මධ්‍යම බෙංගාල බොක්ක මුහුදු ප්‍රදේශය ආශ්‍රිතව සුළි කුණාටුවක් දක්වා වර්ධනය වීමට ඉතා ඉහළ සම්භාවිතාවක් පවතින බව සඳහන්ය.