ප්‍රමුඛ පෙළේ Layer-1 බ්ලොක්චේන් (Blockchain) පද්ධතියක් වන Initia ජාලයට අයත් DEX Aggregator සේවාව ඉලක්ක කරගනිමින් ක්‍රියාත්මක වූ මහා පරිමාණ සයිබර් ප්‍රහාරයකින් ඩොලර් මිලියන 3.27ක අතිවිශාල ක්‍රිප්ටෝ වත්කම් ප්‍රමාණයක් සොරාගෙන ඇති බව වාර්තා වේ. සති 3ක් වැනි කෙටි කාලයක් ඇතුළත මෙම ජාලය ආශ්‍රිතව සිදුවූ දෙවැනි ආරක්ෂක බිඳවැටීම මෙය වීම විශේෂත්වයකි.
ආරක්ෂක විශ්ලේෂකයින් පෙන්වා දෙන්නේ Initia හි Interwoven Aggregator ස්මාර්ට් කොන්ක්‍රැක්ට් (Smart Contract) පද්ධතියේ පැවති 'arbitrary call' නම් තාක්ෂණික දුර්වලතාවයක් (exploit) ප්‍රහාරකයින් විසින් අනිසි ලෙස භාවිතා කර ඇති බවයි. නොසලකා හරින ලද සහ නිසි ලෙස පරික්ෂා නොකළ input parameters හරහා පරිශීලකයින්ගේ ETH, USDC සහ විවිධ Liquid Staking Tokens මෙලෙස අනවසරයෙන් වෙනත් ගිණුම් වෙත මාරු කරගෙන ඇත.
ප්‍රහාරය හඳුනාගත් වහාම ක්‍රියාත්මක වූ Initia තාක්ෂණික කණ්ඩායම අදාළ Aggregator ස්මාර්ට් කොන්ක්‍රැක්ට් පද්ධතිය තාවකාලිකව අත්හිටුවීමට (pause) පියවර ගෙන තිබේ.
නොවැම්බර් මුල් සතියේ එල්ල වූ පළමු ප්‍රහාරයෙන් පසුවද ආරක්ෂක පද්ධති යාවත්කාලීන කිරීමට උත්සාහ කරමින් සිටියදී එල්ල වූ මෙම දෙවැනි ප්‍රහාරයත් සමඟින්, අහිමි වූ අරමුදල් නැවත ලබාගැනීමටත් පද්ධතියේ වැඩිදුර ආරක්ෂාව තහවුරු කිරීමටත් විශේෂ බ්ලොක්චේන් විමර්ශක කණ්ඩායම් (Blockchain Security Auditors) කිහිපයක් දැනටමත් පරීක්ෂණ ආරම්භ කර ඇත.
