"වහාම වෛද්ය පීඨයට බඳවා ගන්න" - ශ්රේෂ්ඨාධිකරණයෙන් විශ්වවිද්යාල කොමිසමට නියෝග
රුසියාවේ පැවති උසස් පෙළ විභාගය සමත් වී ශ්රී ලංකාවේ වෛද්ය පීඨ ප්රවේශය සඳහා සුදුසුකම් ලැබූ සිසුවෙකු විශ්වවිද්යාලයට ඇතුළත් කරගැනීම ප්රතික්ෂේප කිරීම තුළින්, ඔහුගේ මූලික අයිතිවාසිකම් උල්ලංඝනය වී ඇති බවට ශ්රේෂ්ඨාධිකරණය තීන්දු කරන ලදී. ඒ අනුව, අදාළ සිසුවා වහාම දේශීය විශ්වවිද්යාලයක වෛද්ය පීඨයක් වෙත ඇතුළත් කර ගන්නා ලෙස ශ්රේෂ්ඨාධිකරණය විසින් විශ්වවිද්යාල ප්රතිපාදන කොමිෂන් සභාවට නියෝග කර ඇත. බොරැල්ල ප්රදේශයේ පදිංචි ඉසුල දම්සිත් ජයරත්න නම් සිසුවා විසින් ගොනු කරන ලද මූලික අයිතිවාසිකම් පෙත්සමක් විභාග කිරීමෙන් අනතුරුව, ශ්රේෂ්ඨාධිකරණ විනිසුරු අර්ජුන ඔබේසේකර මහතා විසින්, විනිසුරුවරුන් වන ජනක් ද සිල්වා සහ සෝභිත රාජකරුණා යන මහත්වරුන්ගේ එකඟත්වය ඇතිව මෙම තීන්දුව ප්රකාශයට පත් කරන ලදී.
පෙත්සම්කාර සිසුවා කොළඹ රාජකීය විද්යාලයෙන් අ.පො.ස. සාමාන්ය පෙළ සමත් වූ අයෙකු වන අතර, ශ්රී ලංකා ගුවන් හමුදාවේ ගෲප් කපිතාන්වරයෙකු වූ ඔහුගේ පියාට රුසියානු තානාපති කාර්යාලයේ ආරක්ෂක උපදේශක තනතුරක් ලැබීම හේතුවෙන් ඔහුට රුසියාවට යාමට සිදුව තිබේ. එහිදී මෙරට උසස් පෙළට සමාන ජ්යේෂ්ඨ පාසල් සහතික පත්ර විභාගය සමත් වීමෙන් පසු, විදේශ කටයුතු අමාත්යාංශය හරහා මෙරට වෛද්ය පීඨ ප්රවේශය සඳහා ඉල්ලුම් කර ඇතත්, නිර්ණායක නොගැලපෙන බව පවසමින් විදේශ කටයුතු අමාත්යාංශය එම අයදුම්පත ප්රතික්ෂේප කර තිබුණි. මෙම අසාධාරණ ප්රතික්ෂේප කිරීම මගින් තම මූලික අයිතිවාසිකම් කඩ වූ බව සිසුවා විසින් පෙන්වා දුන් අතර, එම කරුණු තහවුරු කරගත් අධිකරණය ඔහුට විශ්වවිද්යාල ප්රවේශය ලබා දීමට නියෝග කළේය.
