මේ මාලිමා ෆෑන් කෙනෙකුගේ අදහසක්. මාලිමාවේ බහුතරයක් දෙනා වගේම රටේ බහුතරයක් දෙනාත් හිතාගෙන ඉන්නෙ මේවා තමයි විසඳුම් කියලා.
රටේ මිනිසුන්ට භාණ්ඩාගාරයෙන් ගෙවලා අඩු මිලට තෙල් දෙනවා වගේ ගොබ්බ වැඩක් තවත් නැහැ. මොකෝ භාණ්ඩාගාරයට තෙල් ආනයනය කරන්නට විදේශ විනිමය එන උල්පතක් තියෙනවායැ. ඩොලර් තියා රුපියල් උල්පතක්වත් එතන නැහැ. භාණ්ඩාගාරයේ තියෙන්නෙ අපි ගෙවන බදු මුදල්. 18%ක් දක්වා වැට් එක වගේ වක්ර බදු දුප්පත්, පොහොසත් හැමෝම ගෙවනවා.
ගෝඨාභයගෙ කාලෙ දක්වාම ඔය කියන වැඩේ කළා. වැඩි මිලට තෙල් ආනයනය කරලා අඩු මිලට රට ඇතුළෙ විකිණුවා. ඒ කාලෙ රුපියල පෙග් කරලා තිබුණෙ. ඒ කියන්නෙ කෘත්රිමව රුපියලේ වටිනාකම ඉහළ තබාගෙන හිටියෙ. ඒකටත් ඩොලර් වැය වුණා.
ඔය විදියට ඉන්ධන වැඩි මිළට ආනයනය කරලා අඩු මිලට දෙනකොට වැඩිම වාසිය යන්නෙ ධනවත්ම පිරිසට. ඔවුන් තමයි පෞද්ගලිකව වැඩියෙන්ම ඉන්ධන පාවිච්චි කරන්නෙ. ඒවට වැඩියෙන්ම ගෙවන්නෙ පිටරටවල වැඩ කරලා රටට ඩොලර් එවන මිනිසුන්. රට ඇතුළෙ නම්, වැට් එකෙන් හැමෝම භාණ්ඩාගාරයට බදු ගෙවනවා. එතකොට ඉන්ධන අඩුවෙන් පාවිච්චි කරන මිනිසුන්ගෙ බදුවලින් ඉන්ධන වැඩියෙන් පාවිච්චි කරන එවුන් සැප විඳිනවා.
