තම 14 හැවිරිදි දියණිය ඝාතනය කොට වැසිකිළි වළක සඟවා තැබූ පියෙකු ඊයේ (06) ගම්පහ පොලිස් අත්අඩංගුවට පත්විය. මෙම සිද්ධිය සම්බන්ධයෙන් පොලිස් විමර්ශන පැවැත්වෙන අතර සැකකරු පොලිස් ප්රශ්න කිරීම්වලදී සිය අපරාධය පිළිගෙන ඇත.
“කුඩු බොන්න සල්ලි දුන්නෙ නැති නිසා මම දුවට ගහලා සල්ලි ගත්තා. දුව සිහිනැතිව වැටිලා සිටියේ. මං කුඩු බීලා එනකොටත් එයා ඒ විදිහටම වැටිලා හිටියා. දුව මැරිලා කියලා හිතලා මං එයාගේ සිරුර ඉටිකොළයක ඔතලා වැසිකිළි වළට දැම්මා” පියා පාපොච්චාරණය කර ඇත.
ගම්පහ මාකවිට ප්රදේශයේ පදිංචි වෘත්තියෙන් පෙදරේරුවකු වන සැකකරු, අයිස් මත්ද්රව්යවලට දැඩි ලෙස ඇබ්බැහි වූ පුද්ගලයෙකු බව පොලිසිය පවසයි. ඝාතනයට ලක්වූ දැරිය, ඒකල ඩී.එස්. සේනානායක විද්යාලයේ ශිෂ්යාවක වන අතර ඇය සිය මව සහ පියා සමඟ ඉදිවෙමින් පවතින නිවසක පදිංචිව සිට ඇත.
මෙම දියණියගේ මව ඒකල ප්රදේශයේ ඇඟලුම් කර්මාන්ත ශාලාවක සේවය කරන අතර ඇය දිනපතා උදෑසන රැකියාව සඳහා පිටත්ව යන්නියකි. දියණියගේ පියා ගම්පහ මාකවිට ප්රදේශයේ පුද්ගලයකුට අයත් තෙමහල් නිවසක් ඉදිකිරීමේ කටයුත්ත භාරගෙන සිටි අතර ඔහු අලුතින් ඉදිවන එම නිවසේ කාමරයක සිය පවුල සමග පදිංචිව සිට ඇත. මීට මාස 3කට පමණ උඩදී මත්ද්රව්ය පානය කිරීමට මුදල් නොමැති අවස්ථාවක සැකකරු සිය බිරිඳගේ කරබැඳි රන්මාලය බලහත්කාරයෙන් රැගෙන ගොස් උකස් කර මුදල් ලබාගෙන තිබේ. පසුව ඔහු එම මුදල් වැයකර අයිස් මත්ද්රව්ය පානය කර ඇත.
බිරිඳ තමන් ලබාගත් මාසික වැටුපෙන් මුදල් එකතු කරගෙන උකසට තබා ඇති රන් මාලය බේරා ගැනීමට මුදල් එකතු කරගෙන තිබේ. පසුගිය 02 වැනිදා උදෑසන බිරිඳ රුපියල් විසි දහසක මුදලක් සිය 14 හැවිරිදි දියණියට ලබාදී පියා සමග ගොස් උකසට තබා ඇති රන් මාලය බේරාගෙන එන ලෙස දැනුම් දී ඇත. බිරිඳ රැකියාවට ගිය පසු දියණියගේ පියා ඇයට කථාකර රුපියල් විසිදහසක මුදල ඉල්ලා ඇත. එහෙත් ඇය එම මුදල ලබාදීම ප්රතික්ෂේප කර තිබේ.
ගැටුම හටගෙන ඇත්තේ මෙම කථාබහ අතරතුරයි. මවගේ රන්මාලයක් උකස් කර ගැනීමේ මුදල් සම්බන්ධ ගැටුමකදී පියා දැරියට පහර දී ඇත. පහරදීමෙන් සිහිසුන් වූ දැරිය මියගිය බව සිතූ පියා, ඇගේ සිරුර ඉටිකොළයක ඔතා වැසිකිළි වළක සඟවා දමා ඇත.
එදින සවස මව නිවසට පැමිණ සිය දියණිය පිළිබඳව සැමියාගෙන් විමසා ඇත. එහිදී ඔහු පවසා ඇත්තේ දියණිය ඇගේ යෙහෙළියක සමග රුපියල් විසිදහසක මුදල් ද රැගෙන විනෝද චාරිකාවක් සඳහා පිටත්ව ගිය බවයි. දින තුනකින් ආපසු එන බව ද ඇය පවසා ගිය බව සැකකරු බිරිඳට කියා ඇත.
දින 03ක් ගතවූ තැන සිය දියණිය පිළිබඳ කිසිදු තොරතුරක් නොමැති විට මව ඒ සම්බන්ධයෙන් ගම්පහ මූලස්ථාන ප්රධාන පොලිස් පරීක්ෂක මොහාන් සිල්වා මහතාට පැමිණිලි කර ඇත්තේ පෙරේදා (05 දා) රාත්රී කාලයේදීය.
පැමිණිල්ල අනුව පොලිස් විමර්ශන ආරම්භ විය. ප්රධාන පොලිස් පරීක්ෂක මොහාන් සිල්වා මහතාගේ නායකත්වයෙන් සිදුකළ විමර්ශනවලදී සැකකරු අත්අඩංගුවට ගැනීමට පොලිසිය සමත් විය.
ගම්පහ ජ්යෙෂ්ඨ පොලිස් අධිකාරී ජගත් රෝහණ මහතාගේ අධීක්ෂණය යටතේ තවදුරටත් විමර්ශන පැවැත්වෙන අතර, සැකකරු අධිකරණයට ඉදිරිපත් කිරීමට නියමිතය.
