මෙවර අවුරුදු නැකැත් අවුල් වුනේ ගිය ආණ්ඩුවේ වරදින්..- සංස්කෘතික අමාත්යංශය
bylanka C news -March 13, 2026
2026 වර්ෂයේ සිංහල හා දෙමළ අලුත් අවුරුදු චාරිත්ර ඉටුකිරීම සඳහා වන නැකත් සම්පාදනය කිරීමේදී පැන නැගී ඇති මතභේදාත්මක තත්ත්වය සමථයකට පත් කිරීම සඳහා බුද්ධ ශාසන, ආගමික හා සංස්කෘතික කටයුතු අමාත්යවරයාගේ ප්රධානත්වයෙන් විශේෂ සාකච්ඡාවක් ලබන 16 වන සඳුදා පැවැත්වීමට කටයුතු යොදා ඇත.
සංස්කෘතික කටයුතු දෙපාර්තමේන්තුව නිවේදනය කරන පරිදි, 2026 වර්ෂය සඳහා නැකත් සැකසීමට කණ්ඩායම් දෙකක් ඉදිරිපත් වී ඇති අතර, ඔවුන් අතර පොදු එකඟතාවක් ඇති කර ගැනීම සඳහා අවස්ථා හතරකදී අමාත්යංශය මට්ටමින් සාකච්ඡා පවත්වා තිබේ. එසේම මේ සම්බන්ධයෙන් රාජ්ය අස්පර්ශනීය කලා උරුම සහ සාම්ප්රදායික කලා අනු මණ්ඩලයේ ද අදහස් විමසා ඇති බව එම දෙපාර්තමේන්තුව පවසයි.
කෙසේ වෙතත්, මේ දක්වා අදාළ පාර්ශ්වයන් අතර අවසන් එකඟතාවක් ඇති කර ගැනීමට නොහැකි වී ඇති අතර, මේ හේතුවෙන් මාධ්ය මගින් ප්රචාරය වන පුවත් නිසා මහජනතාව තුළ දැඩි අවිනිශ්චිතතාවක් නිර්මාණය වී ඇති බව රජය නිරීක්ෂණය කර ඇත.
රටේ සංස්කෘතික වටිනාකම් සුරකිමින්, සියලු පාර්ශ්වයන්ගේ එකඟතාව සහිත ඒකාබද්ධ නැකත් සීට්ටුවක් රටට ඉදිරිපත් කිරීම රජයේ අරමුණයි. ඒ අනුව, ලබන සඳුදා පැවැත්වෙන මෙම තීරණාත්මක සාකච්ඡාවෙන් අනතුරුව අවසන් තීරණය දැනුම් දීමට නියමිතය.
1991 වර්ෂයේ සිට රාජ්ය අනුග්රහය ඇතිව නැකත් සම්පාදනය සිදු වුවද, 2024 වර්ෂයේදී නැකත් කමිටුව තුළ ඇති වූ ආරවුල් හේතුවෙන් එවකට සිටි අමාත්යවරයා විසින් රාජ්ය නැකත් කමිටුව විසුරුවා හරිනු ලැබීය. පසුව 2025 වර්ෂය සඳහා නැකත් සම්පාදනය කරනු ලැබුවේ ස්වදේශ කටයුතු අමාත්යංශයේ පොහොය කමිටුවේ සාම්ප්රදායික පංචාංග ලිත් කතෘවරුන් විසිනි.
අලුත් අවුරුදු චාරිත්ර ඇතුළු දේශීය සංස්කෘතික උරුමයන් ප්රවර්ධනය කිරීම වෙනුවෙන් බුද්ධ ශාසන, ආගමික හා සංස්කෘතික කටයුතු අමාත්යංශය ඉදිරියටත් කැපවී ක්රියා කරන බව එම දෙපාර්තමේන්තුව වැඩිදුරටත් අවධාරණය කරයි.
