ඊශ්රායල් රාජ්යයේ කෘෂි ක්ෂේත්රයේ රැකියා සඳහා යොමු කිරීමේ අරමුණින් ශ්රී ලංකා විදේශ සේවා නියුක්ති කාර්යාංශය විසින් 2023 වසරේ නොවැම්බර් මාසයේ දී ශ්රී ලාංකික ශ්රමිකයින් පිරිසක් තෝරා ගෙන ඇති අතර එහි පළමු කණ්ඩායම 2023 වසරේ දෙසැම්බර් මාසයේ ඊශ්රායලය වෙත පිටත්කර යවා තිබේ.
එමෙන්ම දෙවන පිරිස 2024 වසරේ ජනවාරි මාසයේ පිටත්කර යවා ඇත.
මේ ආකාරයෙන් තෝරාගත් තවත් 2,400ක පමණ වූ පිරිසක් සඳහා කාර්යාංශය විසින් උමන්දාව ඇතුළු ස්ථාන කිහිපයකදී ක්ෂේත්ර පුහුණුවක් ද ලබා දී ඇති අතර ඒ අතරින් 118 දෙනෙකු මේ වනවිටත් කාර්යාංශයට මුදල් ගෙවා ඊශ්රායල් රාජ්ය සමග ගිවිසුම්ද අත්සන් කර අවසන් බව සඳහන් වේ.
එම පිරිසට මෙරටින් පිටත්ව යාමට නියමිතව තිබී ඇත්තේ ඉකුත් 06 වනදාය.
නමුත් තවමත් එම පිරිසට මෙරටින් පිටත්ව යාමට නොහැකි වී ඇත්තේ කාර්යාංශය ඒ සඳහා අවශ්ය කටයුතු සිදුනොකිරීම හේතුවෙන් බවට අදාළ පිරස චෝදනා කරයි.
එමනේම ඉහත සඳහන් 2,400 ක පිරිස ද සම්මුඛ පරීක්ෂණ සඳහා මුහුණ දී, අදාළ පුහුණුවීම නිමකර, වෛද්ය පරීක්ෂණ සඳහා ද යොමු කර අවසන්ව බව ඔවුන් පවසයි.
ඊට අමතරව සම්මුඛ පරීක්ෂණ සඳහා මුහුණ දුන් තවත් 3,000 ක පමණ පිරිසක් ද සිටින බව අගතියට පත් වූ පිරිස සඳහන් කළේය.
මෙවැනි තත්ත්වයක් පවතින අතරවාරයේ පසුගිය 06 වනදා ඉහත සඳහන් 2,400ක් වූ පිරිස වෙත කාර්යාංශය විසින් කෙටි පණිවිඩයක් මගින් දැනුම් දී ඇත්තේ ඔවුන්ට ශාරීරික පරීක්ෂණයක් සඳහා ද මුහුණ දීමට නියමිතව ඇති බවටය. (physical Test)
ඒ අනුව ඊයේ (08) ඒ අතුරින් 500 දෙනෙකුගේ පිරිසක් ඒ සඳහා දියගම මහින්ද රාජපක්ෂ ක්රීඩාංගනය වෙත කැඳවා තිබුණි.
එහිදී, මෙම පරීක්ෂණය ශ්රී ලංකා යුද හමුදා නිලධාරීන් විසින් සිදුකර ඇති අතර, එම පිරිසට කිලෝමීටර 2.4ක දුරක් විනාඩි 10ක් තුල දිව අවසන් කිරීමට නියමිතව ඇත.
ඒ බව ඔවුන්ට යොමු කළ කෙටි පණිවිඩයේ ද සටහන්ව තිබේ.
එසේම කිලෝ 50ක බරක් රැගෙන තවත් මීටර 100ක් යාමට ද ලබාදී ඇත.
පසුව මේ සම්බන්ධයෙන් ඊයේ සහභාගී වූ පිරිස කාර්යාංශයේ සභාපතිවරයා ඇතුළු පිරිස වෙත ගොස් එම දුර දිවීම සඳහා ලබා දී ඇති කාලය දිර්ඝ කරදෙන ලෙස ඉල්ලා තිබේ.
නමුත් ඔවුන් ඒ සඳහා යහපත් ප්රතිචාරයක් දක්වා නොමැති අතර ශාරිරික පරීක්ෂණය ඒ ආකාරයෙන්ම පවත්වා ඇත.
එහිදී කිහිපදෙනෙකුම ක්ලාන්ත වී වැටී ඇති අතර සුවසැරිය ගිල්න් රථ ගෙන්වා ඔවුන් රෝහල් ගත කිරීමට පියවර ගත් බව අගතියට පත් පිරිස වැඩිදුරටත් පැවසීය.
