පැවිදිවීම සඳහා විහාරස්ථානයට පැමිණි 14 හැවිරිදි බාලවයස්කාර පිරිමි දරුවෙකු එදින රාත්රියේ ම බරපතළ ලෙස ලිංගික අපයෝජනයට ලක් කළ 65 හැවිරිදි භික්ෂුවකට වසර 30ක බරපතළ වැඩ සහිත සිර දඬුවමක් නියම කෙරිණි.
අදාළ භික්ෂුවට එරෙහිව මහාධිකරණය හමුවේ අධිචෝදනා 3ක් ගොනු කර තිබූ අතර, භික්ෂුව එකී අධිචෝදනා තුනට ම වරදකරු බවට තීන්දු කළ ළමා අපරාධ පිළිබඳ අනුරාධපුර විශේෂ මහාධිකරණ විනිසුරු සඳුන් විතාන විත්තිකාර හිමිනමට එම දඬුවම නියම කළේ ය.
ඊට අමතරව වින්දිත බාලවයස්කාර දරුවාට මුදලින් රුපියල් ලක්ෂ 5ක වන්දියක් ගෙවන ලෙසට ද විත්තිකාර හිමි නමට නියෝග කළ මහාධිකරණ විනිසුරුවරයා එම වන්දි මුදල ගෙවීම පැහැර හැරියහොත් විත්තිකාර භික්ෂුවට තවත් මාස 6ක සිර දඩුවමක් ද නියම කෙරිණ.
ඊට අමතරව විත්තිකාර හිමිනමට පළමු චෝදනාවට රුපියල් 5000ක් ද, දෙවන සහ තුන්වන චෝදනාවලට රුපියල් 15000 බැගින් ද දඩ ගෙවන ලෙසට නියෝග කළ විශේෂ මහාධිකරණයේ විනිසුරු සඳුන් විතාන, එම දඩ මුදල ගෙවීම පැහැර හරින්නේ නම් චෝදනා 3ට වෙන් වෙන් වශයෙන් තවත් මාස 4 බැගින් සිර දඬුවම් නියම කළේ ය.
එක් අධිචෝදනාවකට දස වසර බැගින් වෙන් වෙන් වශයෙන් මෙම 30 වසරක සිර දඬුවම නියම කෙරිණ. තම සේවාදායක විත්තිකාර හිමිනම විවිධ අසනීප තත්ත්වයන්ගෙන් පෙළෙන අයෙකු බව මහාධිකරණයට වෛද්ය වාර්තා ඉදිරිපත් කරමින් විත්තිකාර භික්ෂුව වෙනුවෙන් පෙනී සිටි නීතීඥ සුරංග මොහොට්ටි දැක්වූ කරුණු සැලකිල්ලට ගත් විශේෂ මහාධිකරණ විනිසුරුවරයා, විත්තිකරුට නියම කළ බරපතළ වැඩ සහිත 30 වසරක සිර දඬුවම දස වසරකින් එක් වර ගෙවී යා යුතු බවට ද නියම කළේ ය.
දඬුවම් නියම වූයේ කාට ද?
මෙසේ බරපතළ සිරදඬුවම් නියම වූයේ, තඹුත්තේගම, හුරිගස්වැව, තලාකොළවැව ශ්රී සම්බුද්ධ වාලුකාරාමාධිපති මුල්ලේරියාවේ විමලතිස්ස නමැති 65 හැවිරිදි හිමිනමකට ය.2022 වසරේ මැයි මස 10 වන දින හෝ ඊට ආසන්න දිනයක අනුරාධපුර මහාධිකරණ බල ප්රදේශයට අයත් හුරිගස්වැව, තලාකොළවැවදී මෙම අපරාධය කළ බවට නීතිපතිවරයා විත්තිකාර භික්ෂුවට එරෙහිව අනුරාධපුර මහාධිකරණය හමුවේ අධිචෝදනා ගොනු කර තිබිණ.
නඩුවේ තීන්දුව ප්රකාශයට පත් කිරීමට පෙර නීතිපතිවරයා නියෝජනය කරමින් පැමිණිල්ල වෙනුවෙන් පෙනී සිටි නීතිඥ චාමික ගුරුගේ විවෘත අධිකරණයෙන් ඉල්ලා සිටියේ, මෙවැනි අපරාධ කරන පුද්ගලයින්ට නීතියේ පවතින ප්රතිපාදන මත උපරිම දඬුවම් ලබාදෙන ලෙස ය.
මෙම නඩුවේ මූලික විභාගය තඹුත්තේගම මහේස්ත්රාත් අධිකරණය හමුවේ පැවති අතර, නීතිපතිවරයා විත්තිකරුට අධිචෝදනා ගොනු කිරීමෙන් අනතුරුව වැඩිදුර විභාගය සඳහා අනුරාධපුර මහාධිකරණය හමුවට යොමු කර තිබිණි.
විත්තිකාර විහාරාධිපති භික්ෂුව විසින් බරපතළ ලිංගික අපයෝජනයකට ලක් කරනු ලැබූ 14 හැවිරිදි බාලවයස්කාර දරුවා සම්බන්ධයෙන් අධිකරණ වෛද්ය පරීක්ෂණය පැවැත්වූ අනුරාධපුර ශික්ෂණ රෝහලේ එවකට හිටපු අධිකරණ වෛද්ය නිලධාරී එච්.ඒ. කරුණාතිලක සහ මෙම අපරාධය සම්බන්ධයෙන් විමර්ශන මෙහෙයවූ තඹුත්තේගම පොලිස් නිලධාරීන් 7 දෙනෙකු මෙම නඩු විභාගයේ සාක්ෂිකරුවන් ලෙස කැදවා තිබිණ.
පන්සලෙන් පැන ගිය දරුවා පොලිස් නිලධාරීන් පිරිසක් භාරයට
14 හැවිරිදි වින්දිත බාල වයස්කාර දරුවා වෙනත් භික්ෂුවක විසින් පැවිදි කිරීම සඳහා විත්තිකාර මුල්ලේරියාවේ විමලතිස්ස නැමති තලාකොළවැව ශ්රී සම්බුද්ධ වාලුකාරාමාධිපති භික්ෂුවට 2022 වසරේ මැයි මස 10 වන දින භාර දෙනු ලැබ තිබූ බවත්, එදින ම රාත්රී විත්තිකාර භික්ෂුව විසින් බාලවස්කාර වින්දිත දරුවා බරපතළ ලිංගික අපයෝජනයට ලක් කර තිබූ බවත්, අධිකරණ නඩු විභාගයේදී අනාවරණය විය.විත්තිකාර විහාරාධිපති භික්ෂුව බාල වයස්කාර පිරිමි දරුවා අපයෝජනය කිරීමෙන් අනතුරුව විහාරස්ථානයට පැමිණි පළමු දිනයේදී ම රාත්රියේ විහාරස්ථනයෙන් පැනගොස් ඇති දරුවා මාර්ගයේ ගමන් කරමින් සිටියදී තඹුත්තේගම පොලිස් නිලධාරීන් කණ්ඩායමක් සිය භාරයට ගෙන දරුවාගෙන් කළ ප්රශ්න කිරීමකදී මෙම අපරාධයේ සුලමුල හෙළි කර ගැනීමට හැකි වූ බව ද අධිකරණ නඩු විභාගයේදී තවදුරටත් අනාවරණය විය.
පැමිණිල්ල වෙනුවෙන් නීතිපතිවරයා නියෝජනය කරමින් ළමා අපරාධ පිළිබඳ අනුරාධපුර විශේෂ මහාධිකරණයේ නීතීඥ චාමික ගුරුගේ පෙනී සිටි අතර, විත්තිකාර විහාරාධිපති භික්ෂුව වෙනුවෙන් නීතීඥ සුරංග මොහොට්ටි පෙනී සිටියේ ය.
තඹුත්තේගම පොලිසිය මෙම අපරාධය සම්බන්ධයෙන් විමර්ශන මෙහෙයවීය.
