*********************
සුදුයි
ඈ ලස්සනයි
තනි කරලෙ කොන්ඩේ
ඇවිදින්නෙ හරි හෙමින්
පොලවටත් රිදේදෝ
පාන්දරම දැක්කේ
හෝල්ට් එකේ හිටියේ
මට වඩා තරුනයි
ඈ හුඟක් බාලයි
මා ළඟට ආවා
මා ලඟට ලංවෙලා
හිමීහිට ඇහුවා….
මාත් එක්ක යන්න පුළුවන්ද ?
හාං
මං කිව්වා
මගේ අත අල්ලාන
ඈ හෙමින් පාවුනා
අපි දෙන්න ඇවිද්දා
ඈ ලඟ හරි සුවඳයි..
හදවතේ මුල්ලටම කිඳායන සුවඳයි
ඇගෙ සුමුදු කම්මුලක්
උරහිසේ වදිනවා
ඔයාට කෙල්ලෙක් නැද්ද ?
වචන බාගයක් අරං
මං දමල විද්දා
ම්හ් …නෑ..
ඔයා හරිම කරුනාවන්තයි.
ම්හ්..
මාව ගෙනත් ඇරළලුවාට
ඔයාට බොහෝම
ස්තූතියි….
සින්දුවක තනුවගේ
පද්දලා කිව්වා
ඇගේ සුදු සැරයටිය
අතෑරලා මං ගියා.
