අන්ධකාර ජාතකය
===========
යටැ ගිය දවසැ විකුම්සිහ මොළකරුවාණෝ රාජ්ය විචාරණ සමයයෙහි ලෝකාන්තරික නිරය මෙහි පිහිටියා සේ මුළු මහත් වූ සිවු හෙළයම ගිලෙන අන්ධකාරයක් පැතිරෙන්නට වියැ. විකුම්සිහ මොළකරුවාණෝ ද, තමා ලා ලූ ගිනි තමාට නිවන්ට බැරියා සේ මැද නූලැති පන්දම් සතරක් සතරකොනෙහි දල්වා මද අන්ධකාරයේ ම ඝනාන්ධකාරයට විසඳුම් සොයන්නට වූ හ. එකල්හි හූරු තුඩට සීවැල් තුඩ තැබුවා සේ ඔහුගේ ආදරණීය, සදාදරණීය, නිදානෝන්මාද දෙටු පුරෝහිත ගම්උදාණෝ ද හිස කසමින් පැමිණ, ගින්නට දමා ලූ ලූණු මෙන් තතනමින් " අප දැන් කුමක් කරන්නෙමු දැයි" ඇසූ හ.
"එම්බල පුරෝහිතය, මෙය මිහිඳු රජාණන් පොහොට්ටු කැළ හා එක්ව කරන කුමන්ත්රණයක් බඳු ය. අප වහ වහා මෙය පරාජය කළ යුතු වන්නේ යැයි" සතරකන් මන්ත්රණය කරන්නට වූ හ. එකල්හි පරඬැල් පතක් මෙන් කෘෂ වූ ත්, වාහල්කඩක් මෙන් උස් වූ ත්, සුදෝ සුදු වතින් සැරසුණා වූ ත්, පාඨචම්පා ලී නම් මහා හෙළ බොදුණුවා තුඹසකට ඇදෙන නාගයෙකු පරිද්දෙන් රජවාසලට ඇදෙන්නට විය. වැඩිකල් නොගොස් ම මහත් හඩින් බහුතරය විචාරණ්නට යෙදෙන කථාවෙහි නායක වූ ද, විදෙස් තානාපති සමූහයා ගේ සුරතලා වූ ද, විශ්වතලය ප්රජාතන්ත්රවායෙන් ජයගත්තා වූ ද , කරුවල විෂයෙහි කෙළ පැමිණියා වු කරු මයා ද අඳුරෙහි ම මාලිගයට වැදහොත්තේ ය. " දැන් සියල් සපිරි යැ, අප වහ වහා මෙ අන්ධකාරයට පිරියම් කළ යුතු යැයි " විකුම්සිහයාණෝ තෙපලන්නට වූ හ.
ඉක්බිති මහාමාත්ය පුරෝහිතාදීන් එක්ව අටකන් මන්ත්රණයේ යෙදෙන්නට වු හ. " අප පසුගිය සතර වසරට ම මහ භාණ්ඩාගාරය සොරා කා රටෙහි මරමස්ථාන විකුණා දිවි ගෙවනවා හැරෙන්න ට වෙන යමක් කොට නැත්තේය. රට ද බිඳ වැටී ඇත්තේ ය. සාම්ප්රදායික වෘෂභ ප්රජාව හැරෙන්නට බහුතරයක් රටවැසි ප්රසාදයද අප හට නැත්තේ ය. උඩු සුළගට දැමූ රොඩු දැමුවන් කරාම යන්නා සේ අප කරනා සියලු අවලාද නැවත අප කරාම එන්නේ යැ " යි නියං සමයේ අඬන අහසක් මෙන් විකුම්සිහයාණෝ මහත් වූ හඬක් නගන්නට වූ හ.
එකල්හි උපතින්ම සිවල් නුවණක් ළද පාඨචම්පා ලී පුරෝහිතයන් වහා හඬ අවදි කොට " බිය වීමට කාරණා නැත. දැන් අපට ඉතිරිවැ ඇත්තේ රට වැස්සන්ට විල්පත්තු වනය පෙන්වා හැරපීම පමණය. ඉක්බිති රටවැසි තෙමේ ගම් හුරන් කසලගොඩ ඇලෙන්නා සේ එහිම ඇලී ගැලී වසනු ඇත්තේ ය. පළමුකොට තම සිතුවම් විල්පත්තු බේරාගනු සේ වෙනස් කෙරෙණු ඇත්තේ ය. පෙර පාලකයන් ගේ නෑ සනුහරය ද මතක්කරනු ඇත්තේ ය.එළැඹෙන රාජාභිෂේකයේ දී අපහට විරුද්ධ රට වැසියන් ද භේදබින්න වනු ඇත්තේ ය. විකුණා දමන ඛනිජ නිධිය ද අමතකව යනු ඇත්තේ ය. අප ගසනා අධික බදු ද අමතකව යනු ඇත්තේ ය. ක්ෂීරපිටි ප්රශ්නය ද අමතකව යනු ඇත්තේ ය. මානව හිමිකම් නමින් එන රණවිරු දඩයම ද අමතකව යනු ඇත්තේ ය. දැන් ඉන්නා අන්ධකාරය ද අමතකව යනු ඇත්තේ ය. ඒ සාවෙන් නොබෝ කලකින්ම විදුලි උත්පාදනාගාරය ද විකුණා දමා අපහට සතුටින් කල් යැවිය හැක්කේ යයි " පැවසී ය. "මෙය නම් කදිම උපායෙකි, අප ඉකුත් සිව් වසරම ගෙවා දැම්මේ මෙලෙස ය. ඉදින් තෙපලූ පරිද්දෙන්ම වහ වහා පිරියම් යොදව යැයි" කියා විකුම්සිහයාණෝ පාඨචම්පා ලී පුරෝහිතයනට උවදෙස් දුන් හ. පුරෝහිතයන් ද විකුම්සිහයන් කියූ පරිද්දෙන්ම කළේ ය.
ඉක්බිති රටවැසි තෙමේ අඩ අඳුරේම විල්පත්තු වනයේ සැරිසරණ කල්හි විකුම්සිහ මොළකරුවාණෝ විදුලි උත්පාදනාගාරය කහවනු අසූ දහසකට උතුරුකුරු දිවයිනට විකුණා දැම්මෝ යයි මෙයින් දත යුතු.
අන්ධකාර ජාතකය මෙතකින් නිමියේ වෙයි.
