මේ දින වල යුරෝපය හරහා හමා යන අධික සීතල කාලගුණය හේතුවෙන් පුද්ගලයන් 200කට වැඩි පිරිසක් මරණයට පත්වී ඇතැයි විදෙස් වාර්තා සඳහන් කරයි.
උත්තර ධ්රැවයේ පවතින කටුක කාලගුණයට සමාන තත්ත්වයක් යුරෝපය හරහා පසුගිය මාසය අවසානයේ සිට පැතිර ගිය අතර, මෙම අධික සීතල හේතුවෙන් මියගිය බහුතරය නිවාස නොමැති පුද්ගලයන් වේ.
මෙම සීතල වැඩිපුරම බලපා ඇත්තේ යුක්රේනයට වන අතර, මේ වන විට සීතල හේතුවෙන් පුද්ගලයන් 131ක් මරණයට පත්ව තවත් 1800ක් රෝහල්ගතකර ඇති බව විදෙස් වාර්තා සඳහන් කරයි.
වසර 1999 ට පසුව ඇති වූ දරුණුම හිමපතනය ලද බොස්නියාවේ සරායේවෝ අගනුවරේ හදිසි තත්ත්වයක් ප්රකාශ කර ඇති අතර, දරුණු හිමපතනය හේතුවෙන් සර්බියාවේ 70,000කට පමණ අනිසි ලෙස බලපා ඇතැයි ද වාර්තා වේ.
මේ දක්වා පෝලන්තයෙන් වාර්තා වී ඇති මරණ සංඛ්යාව 53 දක්වා ඉහළ ගොස් ඇති අතර, ප්රංශයෙන් වාර්තා වී ඇති මරණ සංඛ්යාව 04කි.
පසුගිය සෙනසුරාදා දින වසර 25කට අධික කාලයකින් රෝමයට ඇදහැලූනු දරුණම හිමපතනය වාර්තා වූ අතර, සෙල්සියස් අංශක -21.8ක උෂ්ණත්වයක් නෙදර්ලන්තයේ ලෙලිස්ටාඞ් නුවරින් වාර්තා විය. මෙය, වසර 27ක කාලයක් තුළදී නෙදර්ලන්තයෙන් වාර්තා වූ අඩුම උෂ්ණත්වය ලෙස සැලකේ.
