අපගේ ක්ෂීරපථය මන්දාකිණියෙහි තලයට ඉහළින් පිහිටි නව තාරකාවන් උපැද්දවීම සිදුකරන අණුක වළා සංකීර්ණයන් බහුලව පවතින කලාපයක් වන "Cepheus Flare" හි පිහිටා තිබෙන "අඳුරු නිහාරිකාවක්" (Dark Nebulae) ලෙස "Lynds Dark Nebula (LDN) 1251" නම් වූ නිහාරිකාව හැදින්විය හැකිය. පෘථිවියේ සිට ආලෝක වර්ෂ 1000 ක් ඈතින් මෙම "අඳුරු නිහාරිකාව" පිහිටා ඇති අතර මෙවැනි අඳුරු අන්තර්තාරකා වළාවන් තුල බිහිවන නව තාරකාවන් මගින් නිකුත් කරනු ලබන බලවත් කම්පන තරංගයන් පිළිබදව සිදුකරන තාරකා විද්යාත්මක ගවේෂණයන්ට උපකාරී වන දත්ත රැසක් ද මෙම ඡායාරූපය තුල ගැබ් වී තිබේ.
නව තාරකාවන් බිහිවීමේදී නිකුත්වන කම්පන තරංගයන් මගින් හටගන්නා අන්තර්තාරකා සුළං (stellar winds) හේතුවෙන් ඒ අවට වූ වායූන්ගේ සිදුවන කැළබීම් මුල්කොටගෙන එම නව තාරකාවන් වටා නිර්මාණය වන දීප්තිමත් ප්රදේශයන් "Herbig-Haro objects" යනුවෙන් හදුන්වන අතර මෙම ඡායාරූපය තුල සැගවී ඇති මෙවැනි "Herbig-Haro objects", නිහාරිකාව තුළ තැනින් තැන විසිරී යාම හේතුවෙන් හටගන්නා ලද රතු පැහැයට හුරු දීප්තිය මගින් හෙළි කරයි. මේ අතර මෙම නිහාරිකාවෙහි වූ දූවිලි වළාවන්ට පිටුපසින් වන්නට දිස්වන දුරස්තර මන්දාකිණියක් ද මෙහිදී නිරීක්ශනය කළ හැකිය. "Lynds Dark Nebula (LDN) 1251" නිරූපණය වන චමත්කාර දසුන රැගත් මෙම ඡායාරූපයෙන් ආලෝක වර්ෂ 35 කට අයත් වූ වපසරියක් නියෝජනය වන බවද අවසාන වශයෙන් සදහන් කළ යුතුය.
Image Credit & Copyright: Stefano Attalienti
Lynds Dark Nebula 1251
