"James Webb" අභ්යවකාශ දුරේක්ෂයෙහි වූ "Near Infrared Camera" (NIRCam)නම් අධෝරක්ත කිරණ කැමරාව මගින් ලබාගත් මෙම නවතම ඡායාරූපයෙන් නිරූපණය වන්නේ අක්රමවත් මන්දාකිණි (barred irregular galaxy) ගනයට අයත් වන "Wolf–Lundmark–Melotte" (WLM) නම් වූ වාමන මන්දාකිණියයි (dwarf galaxy). පෘථිවියේ සිට ආලෝක වර්ෂ මිලියන 3 ක් ඈතින්, "Cetus' නම් තාරකා රාශියෙහි පිහිටා තිබෙන මෙම මන්දාකිණියෙහි පවතින විශේෂත්වය වනුයේ එය සමන්විත වී පවතින වායූන්, විශ්වයේ මුල් අවධියේදී බිහිවූ මන්දාකිණි නිර්මාණය කිරීමට දායක වූ වායූන්ට සමාන සංයුතියකින් යුක්ත වූ වායූන් වීමය. හුදෙකලා මන්දාකිණියක් වීම හේතුවෙන් මෙම මන්දාකිණිය වෙනත් මන්දාකිණි සමග අන්තර්ක්රියාවන් නොපවත්වන බැවින් මන්දාකිණියන්හි පරිණාමය හා විකාශය පිළිබදව දැනට පවතින න්යායන් නිවැරදි දැයි පරීක්ෂා කිරීමට යොදාගත හැකි මන්දාකිණියක් ලෙස සැලකීම ද තාරකා විද්යාඥයන්ගෙ අවධානය මේ වෙත යොමුවීමට මුල්වී ඇත.
මේ අතර මෙම මන්දාකිණිය සමන්විත වූ නව තාරකාවන්ගේ නිර්මාණය සදහා දායක වන පදාර්ථයන් අතරින් බොහෝමයක් "මන්දාකිණි සුළං" (galactic winds) හේතුවෙන් අහිමිව ගොස් තිබුණ ද මෑතක සිට මෙම මන්දාකිණිය තුළ නව තාරකාවන් බිහිකිරීම ආරම්භ කොට ඇති බව හදුනාගෙන තිබේ. මෙලෙස බිහිවන තාරකාවන් මගින් සංස්ලේෂණය කරන නව පදාර්ථයන් එම තාරකාවන් සුපර්නෝවාවන් ලෙස පුපුරා යාමේදී කුඩා ස්කන්ධයකින් යුක්ත වූ "Wolf–Lundmark–Melotte" (WLM) මන්දාකිණියෙන් ඉවතට නිකුත් වී යාම සිදුවේ. මේ ක්රියාවලීන් හේතුවෙන් මෙම "Wolf–Lundmark–Melotte" (WLM) නම් වූ වාමන මන්දාකිණිය, විශ්වයේ මුල් අවධියේදී බිහිවූ තාරකාවන් හා එම තාරකාවන් කුඩා මන්දාකිණියන් තුළදී පරිණාමය වූයේ කෙසේ දැයි අධ්යයනය කිරීම සදහා ඉදිරියේදී යොදාගත හැකි මහගු තෝතැන්නක් විය හැකි බවත් තාරකා විද්යාඥයන්ගේ මතය වී තිබේ.
"Spitzer' අභ්යවකාශ දුරේක්ෂයෙහි (Spitzer Space Telescope) වූ "Infrared Array Camera" (IRAC) නම් කැමරාවෙන් සහ "James Webb" අභ්යවකාශ දුරේක්ෂයෙහි වූ "Near Infrared Camera" (NIRCam)නම් අධෝරක්ත කිරණ කැමරාව මගින් ලබාගත් "Wolf–Lundmark–Melotte" (WLM) මන්දාකිණියෙහි ඡායාරූපයන් එකිනෙකට සැසදූ විට
Credits: SCIENCE: NASA, ESA, CSA, IPAC, Kristen McQuinn (RU)
IMAGE PROCESSING: Zolt G. Levay (STScI), Alyssa Pagan (STScI)
