ලැබෙන ආරංචි අනුව ලබන 26 වන දින ශ්‍රී ලංකාව තවදුරටත් බංකොලොත් රටක් නොවන බව නිල වශයෙන් ප්‍රකාශ කිරීමට නියමිතය. එය හුදෙක් රනිල් වික්‍රමසිංහ විසින් කරන දේශපාලන ප්‍රකාශයක් නොව, අප ණය ලබාගෙන ඇති අන්තර්ජාතික ණය හිමියන් සමඟ ණය ප්‍රතිව්‍යුහගත කිරීමේ අවසන් ගිවිසුමට අත්සන් තැබීමෙන් පසු ඔවුන් විසින් සිදු කරන ප්‍රකාශයකි.
බංකොලොත් භාවය නොහොත් බුන්වත් බව ප්‍රකාශ කිරීම ආර්ථික විද්‍යාව ඉගෙන ගන්නා විට ඔබට ඉගෙන ගන්නා දෙයක් වේ. ලංකාවේ පුරවැසියකුට තමන් මූල්‍ය ආයතන වලින් ලබාගත් ණයක් තවදුරටත් ගෙවාගෙන යාමට නොහැකි නම්, ඔහුට එරෙහිව එම මූල්‍ය ආයතන නඩු පැවරූ විට, අධිකරණය ඉදිරියේ තම බුන්වත් භාවය ප්‍රකාශ කර සිටිය හැක. එලෙස නිල වශයෙන් තම බුන්වත් බව ප්‍රකාශ කල පුද්ගලයෙකුට ඔහුගේ නමින් තවදුරටත් කිසිදු වත්කමක් තිබිය නොහැකි අතර, ඔහුට තවදුරටත් කිසිදු මූල්‍ය සමාගමක් සමඟ ගනුදෙනු කළ නොහැක.
ශ්‍රී ලංකාව විසින් ලබාගත් ණය තවදුරටත් ගෙවාගෙන යාමට නොහැකි වූ පසු, 2022 දී ශ්‍රී ලංකාව බංකොලොත් රාජ්‍යයක් ලෙස බුන්වත් බව නිල වශයෙන් ප්‍රකාශ කරන ලදී. ඒ සමගම ලංකාවට අන්තර්ජාතික මූල්‍ය සමාගම් වෙත පිවිස ණය ලබාගැනීමේ හැකියාව අහිමිවී ගිය අතර ආනයනික භාණ්ඩ සඳහා ගෙවිය යුතු ඩොලර් නොමැති වීමෙන් රට පුරා පෝලිම් යුගයක් ඇතිවිය.
මේ තත්වයෙන් රට මුදා ගැනීමේ පළමු පියවර ලෙස රජය IMF ආයතනය සමඟ ඇති කරගත් එකඟතාවන් අනුව සිදු කරන ලද ආර්ථික ප්‍රතිසංස්කරණ සමඟ මුලින්ම දේශීය ණය ප්‍රතිව්‍යුහගත කරන ලදී. වඩාත්ම දුෂ්කර කාර්ය වූ අන්තර්ජාතික ණය ප්‍රතිව්‍යුහගත කිරමේ සාකච්ඡා අවුරුද්දකට වැඩි කාලයක් ඇදී ගිය අතර, 26 වෙනිදා එහි අවසාන ගිවිසුමට අත්සන් කරනු ලබයි.
එම සමගම ශ්‍රී ලංකාවට ණය ගෙවීම සඳහා සහන කාලයක් ලැබෙනු ඇති අතර යම්කිසි ප්‍රමාණයකින් ලංකාව ලබාගෙන ඇති අන්තර්ජාතික ණය කපා හැරීමක්ද සිදුවනු ඇත.
වඩාත්ම වැදගත් කාරණය වනුයේ, ලංකාව නිල වශයෙන් තවදුරටත් බංකොලොත් රටක් නොවන බව ප්‍රකාශ කිරීමත් සමග, ලංකාවට නැවත වරක් ජාත්‍යන්තර මූල්‍ය වෙළඳපල වෙත පිවිසිය හැකි අතර, නැවත ණය ලබාගැනීමේ හැකියාවද ලැබෙනු ඇත.
බදු අඩුකර රාජ්‍ය ආදායම අඩුකර ගැනීම, ණය අරගෙන සහනාධාර දීම වැනි අමනෝඥ ක්‍රියා නොකර, මේ තත්වය දිගටම පවත්වාගැනීම ඉදිරියට පත්වෙන රජයන්වල වගකීමකි.
