රට ඉන්න අය ඉක්මනට ඩොලර් එවන්න.. නැතොත් ඔබත් අමාරුවේ..- වසන්ත
පවතින ආර්ථික තත්ත්වය හමුවේ විදේශගතව සිටින ශ්රී ලාංකිකයන් තමන් සතු ඩොලර් මෙරටට එවිය යුතු බවත්, එසේ නොවුණහොත් එහි අහිතකර ප්රතිඵලවලට අවසානයේ ඔවුන්ම ගොදුරු වනු ඇති බවත් අමාත්ය වසන්ත සමරසිංහ මහතා අවධාරණය කරයි.
ඩොලරයේ අගය හෙට හෝ අනිද්දා තවදුරටත් ඉහළ යනු ඇතැයි යන අපේක්ෂාවෙන් ඩොලර් රඳවා තබා ගැනීමෙන් වැළකී සිටින ලෙස අමාත්යවරයා විදෙස්ගත ශ්රී ලාංකිකයන්ගෙන් ඉල්ලා සිටියි.
ඩොලර් මෙරටට එවීමට කටයුතු කිරීම රටේ ආර්ථික ස්ථාවරත්වයට අත්යවශ්ය බව ඔහුගේ අදහසයි.
විදේශගත ලාංකිකයන්ට අමතරව සංචාරක ව්යාපාරයේ නියැලෙන්නන්ට සහ අපනයනකරුවන්ට ද අමාත්යවරයා විශේෂ දැනුම්දීමක් කළේය.
සංචාරක ව්යාපාරයෙන් ලැබෙන ඩොලර් මෙරටට ගෙන්වා ගැනීමටත්, අපනයනකරුවන් සතු විදේශ විනිමය රුපියල් බවට පත් කිරීමටත් කටයුතු කළ යුතු බව ඔහු පෙන්වා දෙයි.
මෙම විදේශ විනිමය නිසි පරිදි රට තුළට ගලා නොඑන්නේ නම්, එමගින් නිර්මාණය වන ආර්ථික අර්බුදයේ ගොදුරක් බවට එම පාර්ශවයන්ම පත්වන බව අමාත්යවරයා පෙන්වා දුන්නේය.
වෙළඳපොළේ පවතින සුවිශේෂී තත්ත්වය ප්රයෝජනයට ගනිමින් පාරිභෝගිකයන් සූරාකෑමට කටයුතු කරන පුද්ගලයන්ට එරෙහිව රජය අනිවාර්යයෙන්ම දැඩි ක්රියාමාර්ග ගන්නා බවද මෙහිදී අවධාරණය කෙරිණි.
එමෙන්ම ඇතැම් පාර්ශවයන් පවතින ආර්ථික තත්ත්වය වැරදි ලෙස විග්රහ කරන බවත්, එවැනි විකෘති විග්රහයන් නිවැරදි කිරීමට කාලය වැය කිරීමට රජයට සූදානමක් නොමැති බවත් අමාත්ය වසන්ත සමරසිංහ මහතා වැඩිදුරටත් ප්රකාශ කළේය
