මෙරටට අලුතින් ගෙනැවිත් අලෙවි කරන යතුරුපැදිවල දම්වැල් (චේන්) ශුද්ධ කිරීමට යාමෙන් අතේ ඇඟිලි කඩාගත් තරුණයන් පස්දෙනෙක්වත් දෛනිකව කොළඹ ජාතික රෝහලට ගෙන ඒමේ අලුත් අනතුරක් නිර්මාණය වී ඇතැයි ප්ලාස්ටික් ශල්ය විශේෂඥ වෛද්ය ගයාන් ඒකනායක හෙළි කරයි.
මෙම යතුරුපැදිවල දම්වැල් නිරාවරණය වී තිබෙන අතර සති දෙකකට වරක්වත් දම්වැල් පිරිසුදු කරන ලෙසට අලෙවි ආයතන නියෝජිතයන් උපදෙස් දුන් බව තුවාල ලබා රෝහල්ගත වන තරුණයන් පවසා තිබේ.
මෙහි බරපතළම ප්රශ්නය වී ඇත්තේ තරුණයන්ගේ හුරු දෑතේ ඇඟිලි පුරුක්වලින් ගැලවී හෝ තැලී ගිය පසු එම කොටස් යළි බද්ධ කිරීමට නොහැකි වීම බවද ඔහු සඳහන් කරයි. ප්ලාස්ටික් සැත්කම් මගින් එම කොටස් බද්ධ කළත් පෙර තිබූ තත්ත්වයට ගත නොහැකි නිසා වටිනා තරුණ ජීවිතවල අනාගතය සියයට පනහකින් විනාශ වන බවද වෛද්යවරයා පැවැසීය.
යතුරුපැදි පණ නංවා දම්වැල් ශුද්ධ කිරීමේ මේ අනතුරු සිදුව ඇතැයි ද කොළඹ ජාතික රෝහලට පමණක් නොව පිට පළාත්වල රෝහල්වලටත් මෙම අනතුර මුල්කරගෙන රෝගීන් පැමිණීමේ ප්රවණතාවක් මතුව ඇති බවත් එම නිසා වහාම මේ පිළිබඳව හෙළි කළ බවත් වෛද්යවරයා සඳහන් කළේය.
මෙම යතුරුපැදි අනතුර වළක්වා ගැනීමට ආරක්ෂිත ක්රම භාවිත කරන ලෙසද වෛද්යවරයා ඉල්ලා සිටියේය. සෞඛ්ය ප්රවර්ධන කාර්යංශයේ ඊයේ (7) පැවැති මාධ්ය සාකච්ඡාවකදී මේ බව හෙළි විය.
- https://www.aruna.lk/articles/homO6FfWwpKX4sQJpvyd
