ජනාධිපති තාත්තා.
අපේ තාත්තා දවසක් රෑවෙලා ගෙදර එමින් සිටියේය.
බස් නැවතුමේ සිට අපේ ගෙදරට ටිකදුරක් ඇවිදගෙන ආයුතුය.
ඔහොම ඇවිදගෙන එන අතරේ පහල ගෙදර සේතං මාමා ලයිට් කනුවක් අසල මොනවාදෝ හොයමින් සිටිනු තාත්තා දැක තිබේ..
මොකද සේතං මේ රෑ ජාමේ බිම අවුස්සන්නේ කියා තාත්තා සේතං මාමාගෙන් අසා ඇත.
අනේ බලන්ටකො ග්රාමසේවක මහත්තයෝ මගෙ සන්තකටම තිබිච්චි රත්තරන් පවුම වැටුන නොවැ කියා සේතං ඉතාමත් කනගාටුවෙන් තාත්තාට පැවසූ බව තාත්තා කීවේය.
ඉතින් තාත්තාද සේතං මාමා එක්ක එකතුවී රත්තරන් පවුම සෙවීමට පටන්ගත්තේය.
සේතං මාමා රා බී වෙරිගතියෙන් සිටින බවක් තාත්තාට දැනුනත් තාත්තා එය වැඩිය ගානකට ගෙන නැත.
විනාඩි පහලවක පමන කාලයක් එතන තිබූ හැම බිම් අඟලක්ම හැම තනකොලයක් ගානේම සොයා බැලූ නමුත් රත්තරන් පවුම සොයාගන්නට නොහැකි වූ බව තාත්තා අපට කීවේ කණගාටුවෙනි.
කෝ බං සේතං.. උඹේ පවුම මෙතන නෑනෙ කියා තාත්තා සේතං මාමාගෙන් අසා ඇත.
ඔව් මහත්තයෝ ඒක මෙතන තියෙන්න විදියක් නෑ කියා සේතං මාමා කියා තිබේ..
කුතුහලයට පත්වූ තාත්තා ඒ මොකද එහෙම කිව්වේ කියා සේතං මාමාගෙන් අසා ඇත.
ඒක මෙතන තියෙන්නෙ කොහොමද ග්රාමසේවක මහත්තයෝ.. ??
ඒක වැටුනෙ ආන්න අතනදි කියමින් සේතං මාමා මීටර් 25ක් පමන ඈතින් වූ තැනක් පෙන්වා ඇත.
අන්දමන්ද වූ තාත්තා ඉතින් බං එතන හොයන්නෙ නැතුව මෙතන හොය හොයා දඟලන්නෙ මොලේ හොඳ නැද්දැයි කෝපයෙන් ඇසුවේය.
එතන කලුවරයිනෙ මහත්තයො ඉතින් කලුවරේ ඕක හොයන්න මට ඔල්මාදෙයැ.. ඉතින් මම මේ එලිය තියෙන තැනකට ඇවිත් හොයන්න ගත්තා කියා සේතං මාමා පිලිතුරු දී ඇත.
ඒ කතාව නිවැරැදි බව තමුන්ටද වැටහුන බව තාත්තා අපට කීවේය. ඒ නිසා දෙන්නාම එකතු වී දිගටම රන්පවුම සෙවීම කරගෙන ගොස් ඇත.
අවසානයේදී සත දෙකේ සහ පහේ කාසි කිහිපයක්, හර්නෙල් කටුවක්, මඩ පුවක් කැබැල්ලක් සහ පත්තෑයෙක් සොයා ගැනීමට තමුන් සමත් වූ බව තාත්තා කීවේ ආඩම්බරයෙනි.
රන්පවුම සෙවීම තාත්තාට අමතක වී තිබිනි.
තාත්තාගෙ හැටි එහෙමය.
සරලය..
! Copied !
උපුටා ගන්නා ලදි
