තෙත්තියන්
නිකම් කියනවාට කියනුවා මිස බොහෝ දෙනකු මේ වචන වහරන්නේ නියම අරුත දැන ගෙන නො වේ. මේ වූකලි දෙමළ වදනෙකැයි ඇතැමකුට සිතෙනු ඇති. එහෙත් එය දෙමළ නො වේ. දෙමළ හැඩයක් පමණි ඇත්තේ.
තෙත්තියන් යන්නෙන් ඇතැමකු අදහස් කරන්නේ අවි ආයුධ මුවහත් කිරීම ය. තව ඇතැමුන් අදහස් කරන්නේ අවි ආයුධ මුවත් තැබීමෙන් පසු මළ නො බැඳීම සඳහා තෙල් ඩිංගක් ගෑම ය. මේ දෙක ම නියම වචනය හා සමඟ ගෑවිලා යන නමුත්, සම්පූර්ණයෙන් නිවැරදි නො වේ.
තෙත්තියන් යන්නේ නිරුක්තිය පැරැණි පොත් පිංචකින් හමු වූ බව විලියම් අල්විස් පඩිතුමා පසුගිය සතියේ ටෙලිෆෝන් මඟින් දැනුම් දුන්නේ ය.
හමු වී ඇති ඒ පොත් පිංච කුඩා අත්පොතක් බඳු එකකි. එහි මුල අග ඉරී ගොස් ය. ඒ වූකලි වැල්ලවත්තේ වෙස්ලියන් මුද්රණාලයෙන් නිකුත් වු පොතක් බව දැක්වෙන සඳහනක් තිබී ඇත.
එක් කලෙක දී ඔය වැස්ලියන් මුද්රණාලයෙන් වටිනා පොත් පිට වු බව පැරුන්නෝ දනිති. මේ පොත් පිංචෙහි තෙත්තියන් ගැන සඳහන් වී ඇත්තේ පරිවර්තනයක් ලෙසිනි. “ Set teeth of a saw ”යන්නෙනි මේ ‘තෙත්තියන්’ යන්නට ප්රභවය ලැබී ඇත්තේ.
මෙහි ඉංගිරිසියෙන් කියන්නේ කියතක දත් කැපීම ය. කියතක දත් කපන්නේ එකක් වමට එකක් දකුණට බරව ය. එයිනි ගස් වැනි දැඩි දේ කැපිය හැකි වන්නේ.
