අගමැති මහින්ද රාජපක්ෂ විසින් ටයිල් ආනයන තහනම ඉවත් කරමින් නිකුත් කල ගැසට් පත්රය පැය කිහිපයක් තුළ අවලංගු කලේ ඉහලින් ආ නියෝගයක් මත යැයි ආනයන අපනයන පාලක ජෙනරාල් දමයන්ති කරුණාරත්න පවසයි.
“එය මුදල් අමාත්යංශයේ ඉහලින් ආ නියෝගයක්. ඒකට හේතු වෙච්ච කාරණා මට මේ වෙලාවේ කියන්න බෑ. කොහොම වුනත් ඒ ගැසට් එක පැය කිහිපයක් ඇතුලත අවලංගු කල නිසා කාටවත් කිසිම වාසියක් වුනේ නෑ.” ආනයන අපනයන පාලකවරිය පෞද්ගලික රූපවාහිනි නාලිකාවක් හා සාකච්ඡාවට එක්වෙමින් වැඩි දුරටත් පවසයි.
කෙසේ වෙතත් ආනයන අපනයන පාලකවරිය මේ මොහොතේ “හෙලිකල නොහැකි” කාරණාව පසුපස ශ්රී ලංකාවට විදේශයකින් මහා පරිමාණයෙන් ටයිල් තොග ආනයනය කල ව්යාපාරිකයෙකුට “විශේෂ වාසියක්” සිදුවී ඇතැදැයි සොයාබැලිය යුතු බව රේගු ආරංචිමාර්ග පවසයි.
ටයිල් අපනයන තහනම ඉවත් කල ගැසට් පත්රය නිකුත් කලේ මුදල් ඇමතිවරයා වන මහින්ද රාජපක්ෂ විසින් වන අතර ආනයන අපනයන පාලකවරිය සඟවන මුදල් අමාත්යංශයේ ඉහලම නිළය දරන්නේද මහින්ද රාජපක්ෂ විසිනි.
