එය මහනුවර අධික වාහන තදබදයක් පවතින සතියේ දිනක දහවලකි. පාසල් හැරෙන වෙලාව බැවින් අධික වාහන තදබදයක්ද, දහවල් වරුවක් වූ බැවින් අධික හිරු රශ්මියක්ද පැවතුනි. මේ මොහොතේ පරණ පේරාදෙණිය පාරේ සිට නුවර දෙසට ධාවනය වන දොර දෙකේ Escort Mk1 කාරයකි. ඔරලෝසු කණුව වටරවුම ඉදිරිපිට ඇති පොලිස් පෝස්ට් එක ඔබට මතක ඇතැයි සිතමි. මෙහි සාමාන්ය පරිදි රාජකාරි කටයුතු වල නිරතවෙමින් සිටින රථවාහන පොලිස් නිළධාරී මහතුන් දෙදෙනකි.
කහ පැහැති දිලිසෙන පින්තාරුවෙන් හා එයටම ගැළපෙන Minilite wheels වලින් සැරසුණු escort රථය අලුත හැඩවුනු මනාලියකගේ සිරිගත් අතර මහමග ගමන් ගන්නා අයගේ අවධානය දිනා ගැනීමට සමත් විය. මේ සමග කදිමට මුසුවෙන එන්ජිමේ හුරුබුහුටි ශබ්දය නිසාත් එහෙමත් කෙනෙකු හැර බොහෝ අයවලුන් මේ දෙස ආපසු හැරී බැලුවෝය.
කාරය වටරවුම පසුකරනවාත් සමග ඉහත කී මහත්වරුන් දෙපළ යුහුසුලුව පිටතට පැමිණ රථය නැවත්වීමට සංඥා කළහ. මෙයට හේතුව නම් රථවාහන පොලිස් නිලධාරී මහතුන් යනු පරණ කාර් දුටු විගස නැවත්වීමට රුසියන් වීමය. කාරය නැවැත්වූ පසු ඔවුන් දුටුවේ overall ඇදුමින් සැරසුණු පුද්ගලයෙකු රියදුරු අසුනේ සිටින අන්දමයි.
එතැන් සිට,
රථවාහන පොලිස් නිළධාරී මහත්වරුන්- "වාහනේ නවත්තල බැහැල එන්න ලයිසන් අරන්".
ඉක්බිතිව රියදුරු අදාල ලියකියවිලි ගෙන දොර හැර පොලිසි නිළදාරී මහතාට ආමන්ත්රණය කළේය.
"මහත්තයා මේකේ Idle හිටින්නෙ නෑ. මේ ගරාජ් එකට ගෙනියන ගමන් හදන්ඩ. බැහැල අවොත් එන්ජිම නවතියි. ඊට පස්සේ මේක ස්ටාර්ට් කරගන්නත් බෑ, ඉලෙක්ට්රික් අවුලකුත් තියෙනවා වගේ. තල්ලු ස්ටාර්ට් දාලයි ස්ටාර්ට් කරගත්තෙත්.
පොලිස් නිළධාරීන්- "ඇයි වාහනේ පාරට දාන්ඩ කලින් හදාගන්න දන්නේ නැද්ද?"
රියදුරු- "මහත්තයා මේක හදන්න ගරාජ් එකට ගෙනියන්න ඕනේ. මේ ගෙනියන ගමන්".
පොලිස් නිළධාරීන්- "කමක් නෑ අපි ඒක ඊට පස්සේ බලමුකෝ. කීවහම ඔහොම නවත්තල මෙතෙන්ට එන්න".
ඉන්පසු රියදුරු කාරය නවත්වා නිවුට්රල් කර පැමිණියේය. මේ අතර කීවාක් මෙන්ම ටික වෙලාවකින් කාර් රථයේ එන්ජිම නතරවිය. ලයිසන් ඉන්ශුරන්ස් ඇතුලු ලියකියවිලි පිරික්සූ පොලිස් නිළධාරීහු ඉන්පසු කාරය පිරික්සීමට පටන් ගත්හ. රෝද, කන්නාඩි ඇතුලු දේ බලා ඉන්පසු කාරය ඇතුලටත් හිස දමා බැලු ඔවුන් රියදුරුට යාමට සන් කලහ.
අසරණ මුහුණක් පෑ රියදුරු, "මහත්තයා මේක ස්ටාර්ට් වෙන්නේ නැහැ".
පොලිස් නිළධාරීන්- "දැන්ද ඕයි කියන්නේ?"
රියදුරු- "ඇයි මම මහත්තයලට නවත්තන්ඩ කලින්ම කිව්වේ. මේක ස්ටාර්ට් වෙන්නේ නෑ. තල්ලු ස්ටාර්ට් විතරයි වැඩ කියල".
මේවනවිට කාර් රථයට පිටුපසින් රථවාහන පොලිමක්ද තදබදයක්ද නිර්මාණය වෙමින් පැවතුනි. පොලිස් නිලධාරීන් අලි මුඩුක්කුව දෙස බැලුවේ රථය තල්ලු කිරීමට ත්රීරෝද රථ රියදුරෙක්ට කතා කිරීමටයි අවාසනාවකට එතැන කිසිවෙක් නොවීය. ඉන්පසු ඔවුන් වටපිට බැලුවේ පාරේ යන සුදුසු කෙනක් අල්ලා ගැනීමට වුවත් කිසිවෙක් නොවීය. පිටුපසින් තිබූ වාහන තදබදයේත් තිබුනේ නවීන පන්නයේ අලුත් වාහන අතර වාහනය තල්ලු කිරීමට බස්සා ගත හැකි අයෙක් නැතිය.
අන් කල හැකි කිසිවක් නොවූ බැවින් පොලිස් නිළධාරීන් දෙපළ ගිනි අව්වේ දහදිය මුගුරු හෙලමින් කාරය තල්ලු කිරීමට පටන් ගත්හ. වරරවුම අසල සිට සම්පත් බැංකුව අසලට පැමිණි පසු රියදුරු ගියරයට දමා ක්ලච් පැඩලය අතහැර කාරය ස්ටාර්ට් කර ගත්තේය. අනතුරුව හිස එලියට දමා පොලිස් නිළධාරී මහත්වරුන් දෙපළට බොහොම ස්තුතියි මහත්තයා යනුවෙන් ස්තුතිය ප්රකාශ කර කාරය පදවාගෙන යන්නට ගියේය.
වැවරවුම වාහන තදබදය මගහැරීමට වේස් පාර්ක් දෙසට හැරවූ ඔහු කන්ද මුදනදී බොම්බයි මොටයි විකුණන වෙළෙන්දෙකු දැක කාරය නැවැත්වීය. අනතුරුව බොම්බයි මොටයි මුලක් මිලදී ගෙන රස බලමින් මද වෙලාවක් ගත කල රියදුරු ඉන්පසු සිගරට්ටුවක් දල්වාගෙන කාරයට නැග අසුන්ගත්තේය. ඉක්බිතිව යතුර කරකවා escort රථය පණගන්වා ගත් ඔහු දෙතොලේ සිනහවකින් යුක්තව ඉගිල ගියේය.
