ආපදා කළමනාකරණ මධ්යස්ථානය විසින් නිකුත් කරන ලද නවතම තත්ත්ව වාර්තාවට අනුව, 2025 දෙසැම්බර් මස 02 වන දින පෙරවරු 10.00 වන විට දිවයින පුරා බලපා ඇති අයහපත් කාලගුණික තත්ත්වය හේතුවෙන් පවුල් 407,594 කට අයත් පුද්ගලයින් 1,466,615 දෙනෙකු පීඩාවට පත්ව සිටිති. මෙම ව්යසනකාරී තත්ත්වය හේතුවෙන් දිවයින පුරා සිදුව ඇති සමස්ත මරණ සංඛ්යාව 410 ක් දක්වා ඉහළ ගොස් ඇති අතර, පුද්ගලයින් 336 දෙනෙකු අතුරුදහන් වී ඇති බව නිල වශයෙන් තහවුරු කර ඇත.
වාර්තාවට අනුව වැඩිම ජීවිත හානි ප්රමාණයක් මහනුවර දිස්ත්රික්කයෙන් වාර්තා වන අතර, එහි මරණ 88 ක් සහ අතුරුදහන් වීම් 150 ක් සිදුව තිබේ. බදුල්ල දිස්ත්රික්කයෙන් මරණ 83 ක් සහ අතුරුදහන් වීම් 28 ක් වාර්තා වී ඇති අතර, නුවරඑළිය දිස්ත්රික්කයෙන් මරණ 75 ක් සහ අතුරුදහන් වීම් 62 ක් සිදුව ඇත. මීට අමතරව කුරුණෑගල දිස්ත්රික්කයෙන් මරණ 52 ක් ද, පුත්තලම දිස්ත්රික්කයෙන් මරණ 27 ක් ද, මාතලේ සහ කෑගල්ල දිස්ත්රික්කවලින් පිළිවෙලින් මරණ 24 ක් සහ 22 ක් ද වාර්තා වී ඇති බව ආපදා කළමනාකරණ මධ්යස්ථානය සඳහන් කරයි.
වැඩිම පුද්ගලයින් සංඛ්යාවක් ආපදාවට ලක්ව ඇත්තේ පුත්තලම දිස්ත්රික්කයේ වන අතර, එම සංඛ්යාව 271,206 කි. කොළඹ දිස්ත්රික්කයේ පුද්ගලයින් 269,403 දෙනෙකු සහ ගම්පහ දිස්ත්රික්කයේ පුද්ගලයින් 205,189 දෙනෙකු පීඩාවට පත්ව සිටින අතර,
මන්නාරම දිස්ත්රික්කයෙන් ද පුද්ගලයින් 127,269 දෙනෙකු ආපදාවට ලක්ව ඇති බව වාර්තා වේ. රත්නපුර, කුරුණෑගල සහ යාපනය වැනි දිස්ත්රික්කවල ද සැලකිය යුතු ජනගහනයක් මෙම අයහපත් කාලගුණික තත්ත්වයේ බලපෑමට හසුව තිබේ.
අවතැන් වූ ජනතාව සඳහා දිවයින පුරා ආරක්ෂිත මධ්යස්ථාන 1,441 ක් ස්ථාපිත කර ඇති අතර, මේ වන විට පවුල් 64,483 කට අයත් පුද්ගලයින් 233,015 දෙනෙකු එම මධ්යස්ථානවල රඳවා සිටිති. පුත්තලම දිස්ත්රික්කයේ පමණක් පුද්ගලයින් 40,821 දෙනෙකු ආරක්ෂිත ස්ථානවල පසුවන අතර, ගම්පහ සහ කොළඹ දිස්ත්රික්කවල ද විසි දහසකට අධික පිරිසක් බැගින් ආරක්ෂිත මධ්යස්ථාන වෙත යොමු කර ඇත.
නිවාස හා දේපළ හානි සැලකීමේදී දිවයින පුරා පූර්ණ නිවාස හානි 565 ක් සහ අර්ධ නිවාස හානි 20,271 ක් වාර්තා වී තිබේ. බදුල්ල දිස්ත්රික්කයෙන් වැඩිම පූර්ණ නිවාස හානි සංඛ්යාව වන නිවාස 269 ක් වාර්තා වී ඇති අතර, කුරුණෑගල සහ ගම්පහ දිස්ත්රික්කවලින් ද සැලකිය යුතු නිවාස හානි ප්රමාණයක් සිදුව ඇත. මෙම තත්ත්ව වාර්තාව ආපදා කළමනාකරණ මධ්යස්ථානයේ අධ්යක්ෂ ජනරාල්වරයා වෙනුවෙන් ජාතික සම්බන්ධීකරණ නිලධාරී ලෙප්ටිනන් කමාන්ඩර් එන්.කේ.එන්.අයි විජේසිංහ මහතා විසින් නිකුත් කර තිබේ.
