ගතවූ පැය 12 කාලය තුළ වෙඩි තැබීම් හතරක් වාර්තා වී තිබේ. එක් මරණයකි. තවත් පුද්ගලයෙක් මේ වනවිට කොළඹ ජාතික රෝහලේ දැඩි සත්කාර ඒකකයේ ප්රතිකාර ගනිමින් ඇත.
පැය 12ක කාලය තුළ මුල්ම වෙඩිල්ල පත්තු වන්නේ කොළඹ ග්රෑන්ඩ්පාස් ප්රදේශයේ දී ය. ඊයේ (5) රාත්රී 11.45ට පමණ වෙඩි තබා තරුණයෙක් ඝාතනය කර තිබිණි.ග්රැන්ඩ්පාස් ප්රදේශයේ මහවත්ත ඔරලෝසු කණුව අසලදී යතුරුපැදියකින් පැමිණි නාඳුනන ඝාතකයින් දෙදෙනෙකු විසින් මෙම වෙඩිතැබීම සිදුකර පලාගොස් ඇති බව පොලීසිය කීවේය.
වෙඩිවැදීමෙන් තුවාල ලැබූ, කැලණිය ප්රදේශයේ 26 හැවිරිදි තරුණයෙක් කොළඹ ජාතික රෝහලට ඇතුළත් කිරීමෙන් පසු මිය ගියේය.
දෙවැනි වෙඩිල්ල පත්තු වන්නේ මේ ඝාතනය සිදුවී පැය දෙකක් ගතවන්නට පෙරය. ඒ මරදාන පංචිකාවත්ත මාර්ගයේ පිහිටි පෞද්ගලික බැංකුවක් ඉදිරිපිටදීය. වෙඩි තැබීම සිදුවන්නේ අද (6) අලුයම 1.40ට පමණය. මේ වෙඩි තැබීම සිදුකර ඇත්තේත් කුලී ඝාතකයින් යැයි සැක කරන යතුරුපැදිකරුවන් දෙදෙනෙක් විසිනි.
තුවාල ලැබූ පුද්ගලයා කොළඹ ජාතික රෝහලේ දැඩි සත්කාර ඒකකයේ මේ වනවිට ප්රතිකාර ලබමින් සිටින්නේය. ඔහු ජීවිතයත් මරණයත් අතර සටනකය.
එම වෙඩි තැබීම සිදුවන අවස්ථාවේ දීම මීගමුවේ ද වෙඩි තැබීමක් සිදුවී තිබිණි. වෙඩි තබා තිබුණේ මීගමුව බන්ධනාගාර පසුපස නිවසකටය. වෙඩික්කරුවන් පැමිණ තිබුණේ යතුරුපැදියකිනි.
අද (6) අලුයම 1.38ට පමණ මීගමුව, කුට්ටුදූව ප්රදේශයේ පිහිටි මෙම නිවසකට වෙඩිතැබීම සඳහා රිවෝලවර් වර්ගයේ ගිනි අවියක් භාවිත කර වෙඩි තබා පලා වෙඩික්කරුවන් කවුද කියා තවම දන්නේ නැත.
මෙම වෙඩිතැබීමෙන් කිසිවෙක්ට හෝ තුවාල සිදුව තිබුණේ නැත.
අද උදේ පානදුර, අලුබෝමුල්ල සඳගලවත්ත ප්රදේශයේ වෙළෙඳසැලකට වෙඩි තැබීමක් සිදුවිය. වෙඩි තැබීම සිදුකර තිබුණේ මිලි මීටර 9 වර්ගයේ පිස්තෝලයකිනි. වෙඩික්කරුවන් පලා ගොස් ඇත.
වෙඩිතැබීම සිදුවන අවස්ථාවේ වෙළඳසැලේ සිට ඇත්තේ කාන්තාවකි. වෙඩි ප්රහාරයක වෙළෙඳසැලේ තිබූ ශීතකරණයකට වැදී ඇත. ජීවිත හානියක් නැත.
- https://lankasara.com/si/පුවත්/ගතවුනේ-පැය-12යි-වෙඩි-තැබීම්-0/
https://hirunews.lk/418679/the-fourth-shot-of-the-day-was-fired-from-alubomulla
