ඊගාවට ගමු අපේ පිරිමි පාර්ශවය හොල්මන් කරවපු ප්‍රසිද්ධම චරිතය... මෝහිනී.
මෝහිනී ගැන මතක් කරපු ගමන් හිතට එන්නෙ මොන වගේ රූපයක් ද? මහ රෑ තනිකඩව පාර තොටේ යන පිරිමින්ට මුණගැහෙන සුදු රෙද්දක් ඇඳගත්ත අතිශය රූමත් කාන්තාවක්, අතේ ඉන්න අතදරු පැටියා, ළමයව වඩාගන්න කියලා දීලා ක්ලාන්ත කරවන හරි ලේ උරා බොන හරි කතාවක්.
මෝහිනී කියන නමේ තේරුම මොකක්ද? 'මෝහය' කියන්නෙ මුළාව, අන්ධකාරය, සිහිය නැතිකම.
මේ රූපකායයි, අපේ හෙළ වෙදකමේ සහ ආයුර්වේදයේ කියන කායික මානසික ලෙඩ රෝගයි අතර සම්බන්ධය පොඩ්ඩක් විමසලා බලමු.
ආයුර්වේදයේ පුරුෂ ශරීරයේ පැවැත්මට බලපාන ප්‍රධානම ධාතුවක් තමා 'ශුක්‍ර ධාතුව'. අධික කාම චින්තාව, රාගය සහ ලිංගික අසහනය නිසා ශරීරයේ වායු ගුණය අධික ලෙස කෝප වෙනවා. මේ වායුව කෝප වෙලා හිසට ගැහුවම ඇතිවෙන්නෙ මොනවා ද? මනෝ විභ්‍රාන්තිය හෙවත් Erotomania. සිහිවිකල් බව, හීනෙන් බයවීම, ශක්තිය ක්ෂය වීම, ස්වප්න මෝචනය කියන කාරණා සිද්ධ වෙන්නෙ මෙන්න මේ වාත කෝප වීම නිසා.
තනිකඩව මහ රෑ යන පිරිමියාට 'සුන්දර ගැහැනියක්' මැවිලා පේන්නෙත්, ළඟට ගියාම සිහිය නැතිවෙලා වැටෙන්නෙත්, ඇඟේ පතේ ලේ වතුර වෙලා ලෙඩ ඇඳට වැටෙන්නෙත් ඔය කියන වායු කෝපය සහ මානසික විකෘතිය නිසා නෙවෙයි ද?
අනෙක් පැත්තෙන් මේ කතාවෙ ඉන්න 'අතදරු පැටියා වඩාගත්තු ගැහැනිය' කවුද?
දරුවෙක් ප්‍රසූත කරපු අම්මා කෙනෙකුට අධික රක්තපාතය හෙවත් ලේ වහනය වීම නිසාත්, පශ්චාත් ප්‍රසව හෝමෝන පෙරළිය නිසාත් දරුණු මානසික බිඳවැටීම් වෙනවා. අද කාලෙ මේකට කියන්නෙ Postpartum Psychosis කියලා. එහෙම වුණාම සමහර මව්වරුන්ට තමන්ගෙ දරුවා ගැන තියෙන හැඟීම නැතිවෙනවා, දරුවා වඩාගෙන මහ රෑ ගෙයින් එළියට බැහැලා මංමුළා වෙලා කැලෑගානේ ඇවිදිනවා, දරුවාව අනුන්ට දෙන්න හදනවා, සමහර වෙලාවට දරුවව විනාශ කරනවා.
ප්‍රසූතියෙන් පස්සෙ ලේ විෂ වෙලා, සිහිවිකල් වෙලා දරුවත් අරන් පාරට බැහැපු අසරණ ගැහැනියගෙ ඛේදවාචකයයි, මෝහිනීගෙ කතාවයි අතර සම්බන්ධය පේනව ද?
පැරැන්නො මේ සංකල්පය ඇතුලෙන් සමාජයට දුන්න පණිවිඩය මොකක්ද?
එකක්, තනිකඩ කොල්ලන්ට රෑ තිස්සෙ පාරවල් ගානෙ රස්තියාදු නොවී ගෙදර ඉන්න කියන එක. අනිත් එක, අනියම් කාම ආශාවන් සහ ක්ෂණික රාගය පස්සෙ එළවන්න ගියොත් තමන්ගෙ පිරිමිකම, ජීව ශක්තිය විනාශ වෙලා අකාලෙ ලෙඩ ඇඳට වැටෙන්න වෙනවා කියන සදාචාරාත්මක අවවාදය. අනික් අතට දරු ප්‍රසූතියෙන් පස්සෙ කාන්තාවකගෙ මානසික සහ ශාරීරික සෞඛ්‍යය කොයිතරම් පරිස්සම් කරන්න ඕනෙද කියන ඇත්ත.
මෝහය, වායු කෝපය, ශුක්‍ර ධාතු හානිය, පශ්චාත් ප්‍රසව උන්මාදය, ලිංගික සංවරය, මෝහිනී... මේ සම්පූර්ණ දාමය ඇතුලෙ තියෙන්නෙ විකාර කතාවක් ද? නැත්නම් අපේ ඇත්තො තමන්ට තේරෙන භාෂාවෙන් සමාජය ලෙඩ නොවී තියාගන්න හදපු අපූරු මනෝවිද්‍යාත්මක දැලක් ද?
