දුම්කොල නේද තහනම්....??
බුලත් විටේ දුම්කොළ කැබැල්ලත් හොරට විකුණන්න වෙලා
නිට්ටඹුව නගරාසන්නයේ වෙළඳසැල් කිහිපයක බුලත් විට වලින් දුම්කොළ කැබැල්ල ඉවත් කොට ඇති මුත් ගැණුම් කරුවන් දුම්කොළ පිළිබඳව විමසන විටදී එය සඟවා ඇති වෙනම ස්ථානයකින් ගෙන රහසින් ගැනුම් කරුවා අතට පත් කිරීමේ සිද්ධීන් කිහිපයක් වාර්තා වෙයි.
මේ සම්බන්ධයෙන් අප කළ විමසීමක දී එම වෙළඳුන් කියා සිටියේ දුම් රහිත දුම්කොළ විකිණීම තහනම් කොට ඇති බැවින් මෙසේ තමන්ට බුලත් විට සඳහා ඇති දුම්කොළ කැබැල්ලද රහසින් ගණුදෙනු කරුවන්ට දීමට සිදුව ඇති බවකි.
2006 අංක 27 දරණ ජාතික මධ්යසාර සහ දුම්කොළ ආඥාපනතට අනුව මෙම දුම් රහිත දුම්කොළ පිළිබඳ මෙම වාරණය පැණවී තිබූ මුත් මෙතෙක් එය ප්රායෝගිකව ක්රියාත්මක වී නොතිබුණි.
ඒ අනුව මෙසේ දුම්කොළ සහිත බුලත් විට විකුණන වෙළඳුන් අත්අඩංගුවට ගෙන අධිකරණය හමුවට පත් කිරීමට මහජන සෞඛ්ය පරීක්ෂකවරුන්ට, ආහාර පරීක්ෂකවරුන්ට, සුරාබදු නිලධාරීන්ට,සහ පොලිස් නිලධාරීන්ට නීතිමය බලය පැවරී ඇත.
මේ සම්බන්ධයෙන් අප හා අදහස් පළ කළ නිට්ටඹුවේ බුලත් විට වෙළඳාම් කරන කාන්තාවක ප්රකාශ කර සිටියේ රුපියල් කෝටි ප්රකෝටි ගණන් මිල කළ හැකි මත් ද්රව්ය අදටත් රට පුරා නිදහසේ සංසරණය වන අතරේ බුලත් විටේ ඇති දුම්කොළ කැබැල්ල මුල්කොට පොලිසි උසාවි ගානේ යාමට සහ දඩ කෑමට අහිංසක මිනිසුන්ට සිදුවීම විශාල ඛෙදවාචකයක් බවය.
එමෙන්ම කිසිදු ධනවත් ව්යාපාරිකයෙකු බුලත් විට නොවිකුණන බවත් බුලත් විටක් සරි කොට එය විකුණා සාගින්දර නිවාගැනීමට දුප්පත් මිනිසුන් දරන උත්සහයක දී උසාවි කැඳවා දඩ මුදල් නියම කිරීම වත්මන් යහපාලන රජයේ මානුෂික බව මනාව ප්රකට කරවන්නක් බවද ඇය කීවාය.
Link
