දිනය: 2023 මැයි 01
"Great Carina Nebula" යනු ආසාමාන්ය ආකාරයේ තාරකාවන් රාශියකට සහ සුප්රසිද්ධ නිහාරිකාවන් කීපයකටම වාසස්ථාන සලසන විශ්වයේ පවතින අපූර්ව ස්ථානයකි. පෘථිවියේ සිට ආලෝක වර්ෂ 8500 ක් පමණ දුරට වන්නට පිහිටා ඇති මෙම නිහාරිකාව අපගේ ක්ෂීරපථයේ පවතින දීප්තිමත්ම හා විශාලතම නිහාරිකාවක් වන ඔරායන් නිහාරිකාවටත් (Orion Nebula) වඩා සිව් ගුණයක විශාලත්වයකින් යුතු හා දීප්තියෙන් ද අධික නිහාරිකාවකි. දැවැන්ත තාරකාවන් බිහිවේමේ ක්රියාවලියන් නිරන්තරයෙන් සිදුවන කලාපයක් ලෙස සැලකෙන මෙම නිහාරිකාව මුල්වරට සොයාගන්නා ලද්දේ ප්රංශ ජාතික තාරකා විද්යාඥයෙකු වූ "Nicolas-Louis de Lacaille" විසිනුයි. ඒ 1752 වසරේදී ඔහුගේ ගවේෂණ කටයුතු සිදුකළ දකුණු අප්රිකාවේ, සුභ පැතුම් තුඩුවෙහි පිහිටි ඔහුට අයත් අභ්යවකාශ නිරීක්ශනාගාරයේදීයි.
මෙම "Carina" නිහාරිකාව තුළ ඇති කුඩා නිහාරිකාවන් අතර "Gabriela Mistral Nebula" නැතහොත් "IC 2599" (ඡායාරූපයේ වම් පස මැදට වන්නට ඇති) නමින් හදුන්වන විමෝචන නිහාරිකාවත් (emission nebula) එය වටා පිහිටා තිබෙන "NGC 3324" නම් වන විවෘත්ත තරු පොකුරත් ප්රධාන වශයෙන් නිරීක්ශනය කළ හැක. මීට අමතරව ඡායාරූපයේ ඉහළ කෙළවරේ මධ්යයට වන්නට පිහිටා ඇති "NGC 3293" නමින් හදුන්වන දැවැන්ත තරු පොකුරත්, "Wolf-Rayet 23" (WR23) නම් වූ තාරකාවත් මෙහිදී නිරීක්ශනය කළ හැකිය. "Wolf-Rayet' ගනයට අයත් තාරකාවන් ඉතා දැවැන්ත, දීප්තිමත් මෙන්ම ඉතාමත් කැළඹිලි සහගත වූ සුළං (තාරකා සුළං - Stellar winds) සහිත හා අයනීකෘත හීලියම්, නයිට්රජන් හෝ කාබන් විමෝචන තීරයන්ගෙන් යුක්ත වූ අසාමාන්ය ආකාරයේ ප්රභාමණ්ඩලයන්ගෙන් සමන්විත වූ තාරකා විශේෂයක් ලෙස සලකනු ලබයි.
මීට අමතරව තරමක දුර්වල වූ දීප්තියකින් දිස්වන තවත් විමෝචන නිහාරිකාවක් ලෙස සැලකෙන "Loden 153"( NGC 3293 තරු පොකුරට දකුණු පසට වන්නට) නම් වූ නිහාරිකාව සහ කලකට ඉහතදී දීප්තිමත්ව තිබූ නමුත් මේ වන විට මියගොස් ඇති, එසේම තවත් වසර මිලියන කීපයකින් සුපර්නෝවා පිපිරීමකට ලක්වෙතැයි අපේක්ශා කරන "Eta Carinae" නම් තාරකාවත් ( ඡායාරූපයේ පහළ දකුණු කෙළවරේ ඇති) මෙම ඡායාරූපය තුළින් නිරීක්ශනය කළ හැකිය.
Image Credit & Copyright: Carlos Taylor
නම් කරන ලද ඡායාරූපය
ජාත්යන්තර අභ්යවකාශ මධ්යස්ථානයට දිස්වූ උතුරු ඇමරිකාවට අයත්ව පිහිටා ඇති විශාලතම කඳු වැටිය: "The Canadian Rockies" 
