ඩයලොග් 5G HBB සේවාවට එරෙහි නඩුව: තාක්ෂණික දියුණුවට අකුල් හෙළන්නේ ඇයි? 
අද වන විට ශ්‍රී ලංකාවේ විදුලි සංදේශ ක්ෂේත්‍රයේ දැඩි කතාබහට ලක්ව තිබෙන ප්‍රධාන මාතෘකාවක් වී ඇත්තේ Dialog සමාගම විසින් ලබාදීමට උත්සාහ කරන 5G Home Broadband (HBB) සේවාවට එරෙහිව SLT Mobitel ආයතනය අධිකරණයට යෑමයි.
මෙරට අන්තර්ජාල පාරිභෝගිකයන් දැඩි අපේක්ෂාවෙන් බලා සිටි වේගවත් තාක්ෂණයකට මෙලෙස නීතිමය බාධා එල්ල වීම හරහා රටේ සමස්ත ඩිජිටල් අනාගතයට සිදුවන බලපෑම කුමක්ද?
ඇත්තටම මෙතන සිද්ධ වෙන්නේ මොකක්ද?මුල්කාලීන කර්මාන්ත එකඟතා (Industry Agreements) අනුව, 5G තාක්ෂණය ලබාදීමට නියමිතව තිබුණේ ජංගම දුරකථන (Mobiles) සඳහා පමණි. ගෙවල්වලට සහ කාර්යාලවලට අවශ්‍ය කරන Home Broadband සේවාවන් සඳහා 5G ලබාදීම එම මුල් ගිවිසුම්වල සඳහන් වී නැතැයි පවසමින් SLT Mobitel ආයතනය අධිකරණය හමුවට ගොස් ඇත.
මොබයිල් 5G සහ හෝම් බ්‍රෝඩ්බෑන්ඩ් (HBB) අතර වෙනස කුමක්ද?ජංගම දුරකථන සඳහා: සාමාන්‍ය ස්මාර්ට් ජංගම දුරකථනයකට අවශ්‍ය වන bandwidth සහ latency එක සඳහා 4G තාක්ෂණය බොහෝදුරට ප්‍රමාණවත්ය.
නිවාස සහ කාර්යාල සඳහා: නමුත් එකම නිවසක හෝ කාර්යාලයක එකවර පුද්ගලයන් බොහෝ දෙනෙක් අන්තර්ජාලය භාවිතා කරන විට, 4G හරහා හෝම් බ්‍රෝඩ්බෑන්ඩ් අවශ්‍යතා සපුරාලීම අසීරුය. 5G තාක්ෂණයේ සැබෑ සහ අත්‍යවශ්‍යම ප්‍රයෝජනය තිබෙන්නේ හරියටම මේ නිවාස සහ කාර්යාල වෙත අධිවේගී අන්තර්ජාල සේවා ලබාදීම තුළය.
අලුත් තාක්ෂණයට මෙහෙම අකුල් හෙළන්නේ ඇයි?එක සමාගමකට මෙරටට අලුත් තාක්ෂණයක් හඳුන්වා දී පාරිභෝගිකයන්ට වඩා හොඳ සේවාවක් ලබා දීමට නොහැකි වන අයුරින් මෙලෙස නඩු පවරා කටයුතු කිරීම පිටුපස ඇත්තේ කුමක්ද?
තරගකාරීත්වය යටපත් කිරීම: වෙළඳපොලේ තමන්ට ඇති ඒකාධිකාරය හෝ ප්‍රමුඛතාවය රැකගැනීම සඳහා ප්‍රතිවාදී සමාගමක නව තාක්ෂණික මෙහෙයුම් ප්‍රමාද කිරීමට හෝ යටපත් කිරීමට උත්සාහ කිරීමක් මෙහිදී දකින්නට ලැබේ.
පාරිභෝගික අයිතීන්ට වන බලපෑම: තාක්ෂණය දියුණු වන විට නීති හා රෙගුලාසිද කාලයට ගැලපෙන ලෙස යාවත්කාලීන විය යුතුය. නමුත් පැරණි ගිවිසුම් පෙන්වමින් නව තාක්ෂණයක් ජනතාවට ළඟා වීම වැළැක්වීම හරහා අවසානයේ අමාරුවේ වැටෙන්නේ මෙරට සාමාන්‍ය අන්තර්ජාල පාරිභෝගිකයාය.
මෙවැනි පසුගාමී ක්‍රියාවන් නිසා ශ්‍රී ලංකාව ඩිජිටල් ආර්ථිකයක් කරා යන ගමනට බලවත් බාධාවක් එල්ල වේ. මේවා අධිකරණ ක්‍රියාවලින් එළියට පැමිණ, කර්මාන්තයේ නියුතු සියලු පාර්ශ්ව එකඟතාවකට පැමිණ විසඳා ගත යුත්තකි.
නැගී එන තාක්ෂණයන්ට මෙලෙස නීති කඩු පහර එල්ල වීම ගැන ඔබේ අදහස කුමක්ද?
අදාළ වීඩියෝව නරඹන්න: 
