වැඩ අවසන් කර කාර්යාලයෙන් පිටතට පැමිණෙන මම ධාරාණිපාත වර්ෂාව මැදින් රාත්රීයේ නිවෙස බලා යමි. මෙසේ ගමන් කරන මගේ දෙපය කුණු ජලය පිරි වලවල් තුලට වැටෙයි. එමගින් ඉහලට පැනනගින ජලධාරාවෝ පාවහන් තුලට ගොස් දෙපා සීතල වී යයි. කුඩය දෙපසින් ඇදහැලෙන මහ වර්ෂාව නිසා ඇදුම් පැළදුම් තෙමී තෙතබරිත වෙමි. මම අපද්රව්ය උතුරා යන කානු මග හරිමින් ඒවාට උඩින් පනිමි. හාත්පස ජලයෙන් වැසී ඇති බැවින් ඉදිරියට තබන පියවරයන් පදික වේදිකාවේ ආවරණය නොවූ ස්ථානයක තබමි යි බියවෙමි. උදෑසන මනරම්ව තිබෙන නගරය වර්ෂාව පතිතවන විට මෙතරම් ජරාජීර්ණ වන්නේ කිමද? සූ සැට අබරණ වලින් සැරසුණු තරුණියක සැරසිලි වලින් තොරවූ විට තම නියම ස්වභාවය පෙන්වන්නාක් මෙන් නගරයද මායාව දුරුකොට තම සත්ය ස්වරූපය පෙන්වයි.
මෙසේ ඇවිදයන මම කල්පනා කරමි. අද රාත්රී ආහාරයට ගන්නේ මොනවාද? නිවෙසට ගොස් නා කියා බඩකට පුරා ආහාර ගෙන උණුසුම් බීමක් පානය කොට සැපට නිදාගනිමි!
මෙසේ සැපට නිදාගත් පසු යලි හෙට දිනය උදාවේ. මම එදිනත් පෙර පරිදි වර්ෂාවේ තෙමෙන ගමනින්ම නැවතත් කල්පනා කරමි. රාත්රී ආහාර පිළිබදව සිහින දැකීමට තරම් පහළ තත්වයකට මා වැටුනේ කෙසේද? එවැනි නොවැදගත් දෙයක් පිළිබදව මම සිහින දැක්කේ ඇයි? මිනිසාගේ සිහින විය යුත්තේ මෙවැනි දෑ ද?
කුඩය දෙපසින් රූරා වැටෙන ජල බිංදු අත්ලට වැටෙන ලෙස මම අල්ල අල්ලමි. මිනිසා ජීවත් වියයුත්තේ කුමක් සදහාද? රැකියා කර විවාහ වී දරුවන් හදා ජීවතය ගත කොට මිය යෑමටද? මම මටම සිනාසෙමි.
මම උපත ලැබුවේ ඇයි? මම කිසිම දිනෙක ඒ පිළිබදව සිතා තිබේද?
මට සැබවින්ම කිරීමට අවශ්ය කුමක්ද?
මම රැකියාවක් කරන්නේ කුමක් සදහාද? හොඳ වෘත්තීය මට්ටමේ සේවකයෙක් වීමටද? මා රැකියාවක් කරන්නේ මට සැබවින්ම එකී පුද්ගලයා වීමට අවශ්ය නිසාද?
ඉන්පසු කුමක්ද? ...රැකියාවෙන් විශ්රාම ගත් පසු ගගක් අද්දර නිවසක් තනා විවේක සුවයෙන් පසු වීමටද?
මට, මගේ ජීවිතයෙන් මා කළ යුතු දෙය තීරණය කිරීමට නොහැකි නම් එය ඉතා කණගාටුදායකය.
මා සැබවින්ම සතුටට පත්වන්නේ කුමක් කිරීමෙන්ද?
මට සිහිනයක් නොමැතිද?...
මගේ සිහිනය කුමක්ද? වෘත්තිය පසුපස හඹා යාමද?
නමුත් එය සිහිනයක් නොවේ. ලගා කර ගත හැකි ප්රායෝගික ඉලක්කයක් පමණි.
ලගා කර ගත හැකි ප්රායෝගික ඉලක්කයකින් පමණක් මා හට සෑහීමට පත්විය නොහැක. එමගින් පමණක් සෑහීමට පත්විය හැකිනම්, මම සිහින හඹා යෑමට තරම් ශක්තිමත් නැත.
සිහිනයක් යනු ලගා කරගැනීමේ හැකියාවක් නොමැති දෙයකි. සිහින පසුපස හඹා යාමට නම් යථාර්ථයෙන් බැහැර වීමට තරම් මිනිසුන් ශක්තිමත් විය යුතුය.
සිහින මරා දමන්නට පෙර අපි ඒ තුල ජීවත් විය යුතුය.
මිනිසා ජීවත් විය යුත්තේ සිහින හඹා යාමටය.
Last edited:
sometimes you cannot achieve the dream, living inside it makes the life exciting and worth living. "the dream was nice while it lasted"
