මා දැනට සේවය කරන ඊශ්රායලයේ සෑම දිනකම හා සෑම තැනකම වාගේ දකින දර්ශණයක් ඡායාරූප ගත කොට මූණුපොතේ පල කල යුතුයයි බොහෝ දිනකට පෙර සිතට නැගුන සිතුවිල්ල අද ක්රියාවට නැගුවෙමි.
මේ පලමු ඡායාරූපයේ සිටින්නේ මේ රටේ පුරවැසිභාවය ඇති අරාබි ජාතික ගාර්ඩ්න් ක්ලීනර් හෙවත් කුලියට වතු පිරිසිදු කරන කම්කරුවෙකි. ඔහු මගේ රැකියා ස්ථානයට යාබදව පිහිටා ඇති නිවෙසක ගෙවත්ත පිරිසිදු කිරීමට සතියකට දෙකකට වරක් පැමිනෙයි. දෙවන ඡායාරූපයෙන් දැක්වෙන්නේ ඔහු පැමිනි මෝටර් රථයයි.. එය පර්ජෝ එස් යූ වී රථයකි. අපේ රටේ නම් වතු සුද්ධ කරන කම්කරුවෙකුට මෙවැනි රථයක් සිහිනයකින් වත් දැක ගත හැකිවේදැයි විශ්වාසයක් නැත. මා වසර 24 ක් හමුදා නිළධාරියෙකු ලෙස සේවය කර මිල දී ගැනීමට හැකි වූයේ මරුති 800 කාර් රථයකි. දෙමාපිය උරුමයෙන් ධනපතියෙකු නොවූ මාහට මා විසින්ම වසර 24 ක් තිස්සේ නීත්යානුකූලව උපයාගත් මුදලින් ගත හැකි වූයේ එපමනකි. ඒ ගැන මට ආඩම්බරය. නමුත් හිතේ දුකක් ඇත. මන්ද මා ඒ වියදම් කල මුදලට මෙවන් රටකදී නම් ඊට වඩා තුන් හතර ගුණයක් වටිනා වාහනයක් මිලට ගැනීමට හැකි වීමය. එමෙන්ම අපේ රටේ දේශපාලකයන් නැමති නිර්ලජ්ජිත අමනුෂ්ය කොට්ඨාශය විසින් රටේ නීති ගරුක සාමාන්ය පුරවැසියන් වන ඔබටත් මටත් අත්කර දී ඇති ඉරණම එයය. අපේ රටේ මිල මුදල් වැඩිපුරම යහමින් ගැවසෙන්නේ දේශපාලුවන්, ඔවුන්ගේ අනුග්රහය ලබන බිස්නස් කාරයන් හා නීතිවිරෝධී ව්යාපාර සිදුකරන දූශිතයන් අතය. රටේ විනයගරුක සාමාන්ය පුරවැසියන් ආහාර වේලක් සපයා ගන්නේ ඉතා අපහසුවෙනි. ඡන්ද කාලයට ගල් පැලෙන බොරු බේගල් අත හරිමින් කතිරය මංකොල්ල කා බලයට පැමිනි පසු ජනතාවට කොකා පෙන්වා උන් සුර සැප විඳිති. උන්ගේ සැපයට හේතු වෙන ලෙස නීති රීති සකසා ගනිති. උන්ට වෙනම හැන්දකින් බෙදා ගන්නා අතර සාමාන්ය ජනතාවට බෙදන්නට උන් ලඟ හැන්දක් නැත. එදා වේල සොයා ගන්නට නොවිදිනා දුක් විඳිනා සාමාන්ය ජනතාවට මේවා පෙනෙන්නේ නැත. පෙනුනත් ඕවා ගැන හොයන්නට ඔවුන්ට වෙලාවක් නැත. උදෑසන අවදි වූ වෙලේ පටන් දවසේ කාරිය කර ගත යුතුය. රට හදන්නට ගියොත් දරුපවුල බඩ ගින්නේය. SUV තබා ආසාවකට මොටර් සයිකල් කට්ටක් ගැනීමත් යුද්ධයක් ජය ගන්නවා හා සමාන ජයග්රහණයකි.
මේ මොනවා කලත්, උනත් කතිර යුද්ධයක් ලංවෙන කොටනම් එදා වේල කන්නට නැතුව බඩ පොත්ත පිටට ඇලුනු ජහමනයා වීරයන්ය
රට බේරා ගැනීමට ඇති අවසන් අවස්තාවේ දිවි පරදුවට තබා පෙරට විත් කතිරය ගසා රට ගොඩ ගන්නා උතුම් කොට්ඨාශයක් ය.
තවත් දෙයක් මේ වේලාවේ කිව යුතුමය. අපේ බහුතර ජහමනයාටත් ලැජ්ජාව කියන නාමයක් ගෑවිලාවත් නැත. කතිර යුද්ධය ලංවූ විට නොමිලේ ලැබෙන අරක්කු කාලටත් බත් පැකට් එකටත් වහල්ව ලැජ්ජාව පසෙක තබා අරූට ජය වේවා මූට ජයවේවා ගගා හදිස්සියකට, මගුලකට, මරණයකට එන්න ඉන්න අල්ලපු ගෙදර එකා එක්කත් ගේම ඉල්ලාගෙන කඩේ යයි. අපිට ඕනෑ අහවලාමයි කියමින් ලතෝනි දෙයි. කතිර යුද්ධය ඉවර වූ දවසට පහුවදා "දැන් ඉතින් අපි දිනුවා වගේ තමයි" කියමින් තාවකාලික ආතල් එකක් ගනියි.මාස කීපයක් ගිය පසු " අනේ ඕකුන් ඔක්කොම එකයි අපිට ඕකුන් වැඩක් නෑ , අපි හම්බ කලොත් අපි කනවා" කියමින් ආපසු සුපුරුදු කට්ට කන්නට පටන් ගනියි. මුන්දලාට SUV තියා ෆුට් සයිකල් කට්ටක් ගන්නට තරමේ වටපිටාවක්වත් හදා දෙන්නට දේශපාලුවන් උනන්දු නොවන්නේ ජහමනයාගේ මේ ගොන් කම දේශපාලුවන් හොඳින් අදුනන නිසාය.
අපි වගේම 1948 වසරේදි කිසිම හව්හරණක් නැතුව පිහිටවූ රටක් වන ඊශ්රායලය අද ලෝකය හොල්ලා ගෙන සිටින්නේ ජනතාවගේ කැපවීම මෙන්ම දේශපාලකයන්ගේ ප්රතිපත්තිගරුක බව නිසාය. අතරින් පතර පොඩි පොඩි වංගු දාන දේශපාලකයන් හිටියත් ලංකාවේ වගේ සෙල්ලම් දාන්නට මෙහේ ජහමනයා ඉඩදෙන්නේ නැත. ඒ බව දන්නා දේශපාලකයන් රටේ ජනතාවට අවශ්ය සියලු පහසුකම් ලබා දීමට කටයුතු කරයි. ඒ වගේම ඒ පහසුකම් භුක්ති විඳිමින් රටේ දියුණුව ගෞරවය රකිමින් ආත්මාභිමානයෙන් ජීවත් වෙන්නට සෑම පුරවැසියෙක්ම කටයුතු කරයි. ඉතින් ඒ නිසාම වතු සුද්ධ කරන කම්කරුවාත් ලංකාවේ නම් ලොකු ලොකු සල්ලි කාරයන් පදින ලෑන්ඩ් රෝවර්, ටොයෝටා ඩබල් කැබ්, පර්ජෝ, බීඑම්ඩබ්ලිව්, වොල්වෝ , අවුඩි වැනි වාහන වල තමන්ගේ පිරිසිදු කරන ආම්පන්න ටිකත් පටවාගෙන උදේට රස්සාවට එයි.....
අන්තිමට කියන්න තියෙන්නේ
වී වපුරපු අය තමයි බත් කන්නේ. තල වපුරපු අයට තල.... ඒක ඇත්තක්ම තමයි....
FB උපුටනයකි..
