ජලභීතිකා රෝගය වැළඳී ඇතැයි සැක කෙරෙන අයාලේ යන සුනඛයකු ඉකුත් සතියක පමණ කාලයක් තිස්සේ උතුරු කළුතර ප්රදේශයේ සැරිසරමින් ළමුන්, කාන්තාවන් ඇතුළු 11 දෙනකු සපා කා ඇතැයි කළුතර මහ නගර සභාවේ සෞඛ්ය අංශයට පැමිණිලි ලැබී ඇත.
උතුරු කළුතර, කැලිඩෝ පාරේ මහෙස්ත්රාත් නිල නිවස ආසන්නයේ ලඳු කැලෑවක රැඳී සිටින මෙම සුනඛයා මාර්ගයේ යන එන අය සපා කෑමට පටන් ගෙන ඇති අතර මේ වන විට ප්රදේශවාසීහු එම මාර්ගයේ ගමන් කිරීමට පවා බියක් දක්වති.
මේ හේතුවෙන් එම ප්රදේශවාසීන්ගේ දෛනික රාජකාරි කටයුතුවලට ද බාධා එල්ලවී තිබේ.
සුනඛයා සපා කෑමෙන් තුවාල ලැබූවන් කළුතර ශික්ෂණ රෝහලෙන් ප්රතිකාර ලබා ගත් බව රෝහල් ආරංචි මාර්ග සඳහන් කරයි. මෙම පැමිණිලි පිළිබඳව සොයා බැලූ කළුතර මහ නගර සභාවේ මහජන සෞඛ්ය පරීක්ෂක අසංක නිර්මල මහතා ජලභීතිකා රෝගය වැළඳී ඇතැයි සැක කෙරෙන මෙම සුනඛයා පිළිබඳව පොලිස් නිලධාරීන් යොදවා අවශ්ය කටයුතු කරන ලෙස උතුරු කළුතර පොලිස් ස්ථානාධිපති ප්රධාන පොලිස් පරීක්ෂක තුෂාර ද සිල්වා මහතාගෙන් ඊයේ (22දා) ලිඛිත ඉල්ලීමක් කළේය
